Ձեր վստահելի աղբյուրը

Մարտի 15-ին նշվում է Սպառողների իրավունքների պաշտպանության միջազգային օրը։ 2017-ից ի վեր առաջին անգամ Սննդամթերի անվտանգության տեսչական մարմինը տոնին նվիրված որևէ միջոցառում չէր կազմակերպել։ Երեկ տեսչական մարմինը մի հաղորդագրություն էր տարածել։

«Սա երկու բանի մասին կարող է խոսել. կամ փոխվել է վերաբերմունքը, կամ տեսչական մարմնի նոր ղեկավարը դեռևս  լավ չի պատկերացնում անելիքները, նրան ժամանակ է պետք այս դաշտ մտնելու համար, անպատրաստ չի ցանկացել որևէ բան նախաձեռնել»,-Panorama.am-ի հետ զրույցում նման կարծիք հայտնեց «Իրազեկ և պաշտպանված սպառող» ՀԿ նախագահ Բաբկեն Պիպոյանը՝ անդրադառնալով ՍԱՏՄ լռությանը։

Նա փաստեց՝ սպառողների օրը սկսեց պետական մակարդակով նշվել 2017-ից, ամեն տարի այդ օրը հանդիպում էին պետական ու հասարակական սեկտորի ներկայացուցիչները, տեղի  էր ունենում բաց երկխոսություն, խնդիրների շուրջ քննարկում, տրվում էին ուղենիշները։

«Թե որքանով էին արդյունավետ իրականացվում դրանք, հարցի մյուս կողմն է, բայց այդ օրը պետական մակարդակով նշվում էր։ Ավելին, ես շատ կարևորել եմ սպառողի իրավունքերի  օրը պետական մակարդակով նշելը, քանի որ դա մեծացնում է հայկական արտադրանքի նկատմամբ դրսի վստահությունը։ Եթե դրսից տեսնում են, որ այստեղ ավելի շատ կարևորում են ոչ թե սպառողի, այլ տնտեսվարողի իրավունքները, սա իր հետ բերում է խնդիրներ արտահանվող ապրանքների ու այլնի հետ կապված»,-նշեց նա։

ՀԿ նախագահը հիշեցրեց կազմակերպության երեկ տարածած հաղորդագրությունը,  որտեղ մասնավորապես  նշվում է. «Սպառողական ոլորտում առկա խնդիրները մղվել են երկրորդ պլան, սակայն թեմայի շուրջ քննարկումների բացակայությունը չի խոսում խնդիրների բացակայության մասին»։

«Երեկ արդեն «Հետք»-ը հրապարկեց իրականացված փորձաքննության արդյունքները, որոնց համաձայն կաթնաշոռ արտադրող տասն ընկերությունից ութի արտադրանքն անվտանգ չէ, չի  համապատասխանում սահմանված չափորոշիչներին»,-ասաց Պիպոյանը։

Անդրադառնալով Տեսչական մարմինների, այդ թվում նաև ՍԱՏՄ-ի,  ղեկավարների փոփոխությանը, Պիպոյանը համոզմունք հայտնեց, որ նրանցից որևէ մեկն իր կամքով  դուրս չի եկել աշխատանքից, այդ մասին որոշում է եղել։ Իսկ թե ինչո՞ւ է նման որոշում կայացվել, պետք է բացատրեն։

«Երբ ասում են՝ տեսչական մարմինների աշխատանքից դժգոհ են, պետք է հասկանալ մի բան, ո՞ւր է գնում պետությունը։ Գուցե սխալը եկել է այն բանից, որ տեսչակա՞ն մարմիններ են ձևավորել, երբ ֆունդամենտալ փոփոխություններ արեցին, ձևավորեցին տեսչական մարմինների գրասենյակ, որը պետք է համակարգեր, բարեփոխեր այդ մարմինների աշխատանքը, միգուցե դա՞ է սխալը, դրա համար չեն հաջողել։ Բացի այդ, կարևոր մի բան էլ կա։ Մենեջմենթի ցանկացած մասնագետ գիտի, որ համակարգերն ունենում են տարբեր փուլեր՝ կայացման, զարգացման, կայունացման, վերակազմավորման և այլն։ Չի բացառվում, որ ինչ-որ մեկն իր աշխատանքը կատարել է, օրինակ, կայացման փուլն է իրականացրել,  գտել են, որ այլ մենեջեր է պետք է զարգացման փուլի համար։ Այսինքն, կարևոր է, որ կամայական փոփոխություն լինի շատ թափանցիկ, որ հասարակության համար հասկանալի լինի՝ որտե՞ղ ենք, ի՞նչ ենք ուզում անել, ի՞նչ խնդիր պետք է լուծվի։ Սակայն չի քննարկվում, թե ի՞նչ պրոբլեմ ունենք և ի՞նչ խնդիր պետք է լուծվի»,-մանրամասնեց Պիպոյանը։

Նա չի բացառում, որ պետությունը որոշել է խստացնել կամ բարելավել  վերահսկողությունը, չի էլ բացառում հակառակը, երբ որոշել են թուլացնել վերահսկողությունը ու դրա համար են փոփոխություններ իրականացնում։

«Ես ուզում եմ փաստել, որ գործընթացը թափանցիկ չէ։ Սա արդեն խնդրահարույց է։ Ասեմ ավելին, ծառայությունից տեսչական մարմին դառնալու ճանապարհին այդ կառույցները որոշակի ներքին դիմադրություն են ցուցաբերել, քանի որ ոլորտի, մասնգիտության հետ առնչություն ունեցող մարդիկ գիտեն, որ վերահսկողության թույլ գործիքները լավ բան չեն և արդյունք չեն ապահովելու։ Հիմա կարևոր հարցն այն է, որ հասկանանք, ով ի՞նչ նպատակով է եկել ու ինչ խնդիր է կատարելու»,-ասաց Պիպոյանը։

Իսկ մինչ այդ նա փաստում է՝ կար մի տոն, երբ բոլորը հավաքվում էին մի հարկի տակ, իսկ հիմա չկա նման հավաք։

«Այդ օրը չկա, էլ չի՞ լինելու, թե՞ չկա, քանի որ  ՍԱՏՄ ղեկավարը նոր եկած մարդ է ու չի պատկերացնում ոլորտը ողջ ծավալով,  իրեն ժամանակ է պետք ներկայանալի լինելու  համար։ Սրանց միջև ֆունդամենտալ տարբերություններ կան։ Բայց այն, որ տեսչական մարմինն ինքը պետք է թափանցիկ լինի,  պետք է ասի՝ ամեն տարի նշել ենք, այս տարի չենք նշում, քանի որ... Խոսք ենք տալիս հաջորդ տարի անել, քանի որ տոնը մեզ համար կարևոր է կամ էլ մնացած տեսչական մարմինների պես համարում ենք, մենք ի՞նչ կապ ունենք  սպառողների իրավունքների պաշտպանության հետ, չէ՞ որ տեսչական մարմինների դեպքում առաջնահերթ սկզբունքների հարց է տնտեսվարողի իրավունքների պաշտպանությունը։ Այսինքն, կան ֆունդամենտալ տարբերություններ, որոնք պետք է գնահատվեն ու ճիշտ որոշում կայացվեն։ Բայց փաստը մնում է փաստ. որ ոլորտում էլ ստուգում իրականացնենք, կտեսնենք այն խայտառակ պատկերը, որը հրապարակեց «Հետք»-ը։ Նաև շատ կարևոր է, ցանկանո՞ւմ է վերահսկողություն իրականացնող մարմինը դա անել, թե՞ չի ցանկանում, թե՞ ցանկանում է այնքան գործել, որ մի օր տեսնի՝ պատկերն էլ խայտառակ չի»,-նշեց ՀԿ նախագահը՝ ընդգծելով, որ լռությունը ենթադրում է վատ նպատակներ, պրոբլեմներ կան, բայց դրանց մասին չի խոսվում, ինչը հետընթաց է։