Ձեր վստահելի աղբյուրը

Մասնագետների ջանքերի շնորհիվ Google-ում  Aravot.am-ի օգտահաշիվը վերականգնվել է։ Սակայն խմբագրությանը  երկարատև գործընթաց է սպասվում։ Առևանգված յութուբյան ալիքում չարագործների գործողությունների հետևանքով ալիքը սառեցված է։

«Այս պահին վերականգնվել է միայն Google-ին մեր հասանելիությունը։ Բայց մեր յութուբյան ալիքը վերականգնված չէ։ Բացի այն, որ ալիքն առևանգածները  կոտրել են յութուբյան ալիքը, ջնջել են տեսանյութերը,  նաև ինչ-որ գործողություններ են իրականացրել,  վնասաբեր ծրագրեր են գործարկել, ինչի հետևանքով ալիքը սառեցված է, քանի որ «այն խախտել է Յութուբի համայնքի կանոնները»,-Panorama.am-ի հետ զրույցում իրավիճակը ներկայացրեց «Առավոտ» օրաթերթի առցանց տարբերակի խմբագիր Աննա Իսրայելյանը։

Նրա խոսքով, Google-ի հետ բանակցություններին զուգահեռ  խմբագրությանն աջակցող մասնագետները պետք է առանձին կապի մեջ լինեն նաև Յութուբի հետ, որպեսզի ալիքը վերադարձնեն այն տեսքին, ինչպիսին եղել է մինչև հարձակումը, փորձեն վերականգնել ջնջված տեսանյութերը։

«Քանի որ հաքերային հարձակումն արվել է համակարգիչների միջոցով, դրանք դեռ պետք է  ֆորմատ արվեն, մաքրվեն վնասաբեր ծրագրերից, քանի որ համանման հարձակման ենթարկված  մեր գործընկերների, ես ի նկատի ունեմ «Իրազեկ քաղաքացիների միավորում»-ը, փորձը վկայում է, քանի դեռ համակարգիչները չեն մաքրվել, եթե մուտք գործենք օգտահաշիվ, նույն պատմությունը կկրկնվի»,-ասաց Աննա Իսրայելյանը։

Խմբագրությանն օգտահաշիվը վերականգնելու հարցում  օգնել են CyberHUB-ի թիմն ու դրա համահիմնադիր Արթուր Պապյանը։

«Չարագործներն օգտագործել են ֆիզիկական անվտանգության բանալի, դա հատուկ սարք է և նման սարքի օգտագործումը վկայում է այն մասին, որ հաքերները նպատակ են ունեցել, այսպես կոչված, երկարաժամկետ վերահսկողություն հաստատել օգտահաշվի վրա և ոչ մի դեպքում դրա մուտքը չզիջել հետ՝ «Առավոտ»-ին»,-ասել է  Պապյանը:

Panorama.am-ի հետ զրույցում Ա. Պապյանը  դժվարանում է ասել, երբ կվերականգնվի խմբագրության յութուբյան ալիքին հասանելիությունը, քանի որ ամեն բան կախված է Google-ից, որը բազմաթիվ ստուգումների արդյունքում կկայացնի որոշում։