Ձեր վստահելի աղբյուրը

3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովին կալանավորելու որոշման դեմ Վճռաբեկ դատարան բողոք կներկայացվի: Panorama.am-ի հետ զրույցում ասաց Գ. Խաչատուրովի շահերի ներկայացուցիչ Հակոբ Ենոքյանը:

Նա նշեց, որ իրենք դատարանի որոշումը գնահատում են անհիմն և ապօրինի։

«Որոշման համաձայն, կալանավորման համար որպես հիմք է նշվել հնարավոր վտանգը, որ կարող է ազդեցություն ունենալ դատավարության մյուս մասնակիցների նկատմամբ, չկատարի իր դատավարական պարտականությունները»,- ասաց պաշտպանը։ 

Հիշեցնենք, որ Հակակոռուպցիոն դատարանը, դատավոր Տիգրան Դավթյանի նախագահությամբ, փետրվարի 21-ին մերժել էր Գրիգորի Խաչատուրովի կալանավորման միջնորդությունը: Դատախազությունը բողոքարկել է դատական ակտը՝ պահանջելով կալանավորել Խաչատուրովին։ Վերաքննիչ դատարանը նախօրիեն բավարարել է դատախազի միջնորդությունը և Գրիգորի Խաչատուրովի նկատմամբ կիրառել է կալանք խափանման միջոցը՝ երկու ամիս ժամկետով։

Գրիգորի Խաչատուրովը ձերբակալվել էր ԱԱԾ-ում քննվող՝ Սեյրան Օհանյանին առնչվող քրեական վարույթի շրջանակներում: Դատախազության ավելի վաղ տարածած հաղորդագրության համաձայն, Գրիգորի Խաչատուրովի նկատմամբ քրեական հետապնդում է հարուցվել փողերի լվացման համար։ Գործը վերաբերում է  Արարատի մարզի Արմաշ համայնքում հողատարածքի գնմանը։ Ըստ դատախազության տարածած հաղորդագրության, հողատարածքը գնած Էդգար Արշակյանը Գրիգորի Խաչատուրովին փոխկապակցած անձ է։