Ձեր վստահելի աղբյուրը

Ամերիկացի ձեռնարկատեր Իլոն Մասկը հայտարարել է, որ նախկին նախագահ Դոնալդ Թրամփի ձերբակալությունը կապահովի նրա վերընտրությունը 2024 թվականի նախագահական ընտրություններում, գրում է «Ռիա Նովոստի»-ին։

Նշենք, որ Թրամփն այսօր՝ մարտի 18-ինհայտարարել է, որ երեքշաբթի՝ մարտի 21-ին իրեն կարող է  ձերբակալեն, ինչի կապակցությամբ իր կողմնակիցներին կոչ է արել դուրս գալ բողոքի ցույցերի: Նախկին նախագահը քննադատել է Մանհեթենի «կոռումպացված և խիստ քաղաքականացված» շրջանային դատախազությանը:

«Եթե դա տեղի ունենա, Թրամփը կվերընտրվի ջախջախիչ հաղթանակով»,- գրել է Մասկը Twitter-ում՝ մեկնաբանելով նախկին նախագահի հնարավոր կալանավորման մասին լուրերը։

Հիշեցնենք, որ ավելի վաղ NBC-ն հայտնել էր, հաջորդ շաբաթ Թրամփին կարող են մեղադրանք առաջադրել այն բանի համար, որ նա իբր վճարել է պոռնոդերասանուհի Սթորմի Դենիելսին մի քանի տարի առաջ իրենց սիրավեպի մասին լռելու համար: Հեռուստաալիքի տվյալներով՝ ուժայիններն արդեն սկսել են նախապատրաստվել Նյու Յորքի կենտրոնում հնարավոր անկարգություններին, որտեղ ընթանում է գործընթացը:

Ինքը՝ Սպիտակ տան նախկին ղեկավարը, հերքում է թե՛ կապը դերասանուհու հետ, թե՛ իր կողմից անօրինական գործողությունները։ Նա հրաժարվել է ցուցմունք տալ երդվյալ ատենակալներին։