Ձեր վստահելի աղբյուրը

«Գրիգորի Խաչատուրովն այդ գույքը ձեռք բերելու որևէ խոչընդոտ չուներ»,- ասուլիսում ասաց 3-րդ բանակային կորպուսի նախկին հրամանատար, գեներալ-մայոր Գրիգորի Խաչատուրովի պաշտպան Հակոբ Ենոքյանը՝ անդրադառնալով գույքի իրական ձեռք բերողին թաքցնելու պնդումներին։

Հիշեցնենք՝ Գրիգորի Խաչատուրովը մեղադրվում է ԱԱԾ-ում քննվող՝ Սեյրան Օհանյանին առնչվող քրեական վարույթի շրջանակներում: Դատախազության ավելի վաղ տարածած հաղորդագրության համաձայն, Գրիգորի Խաչատուրովի նկատմամբ քրեական հետապնդում է հարուցվել փողերի լվացման համար։ Գործը վերաբերում է  Արարատի մարզի Արմաշ համայնքում հողատարածքի գնմանը։ Ըստ դատախազության, հողատարածքը գնած Էդգար Արշակյանը Գրիգորի Խաչատուրովին փոխկապակցած անձ է։ Էդգար Արշակյանի նկատմամբ որպես խափանման միջոց է կիրառվել բացակայելու արգելքը, իսկ Գրիգորի Խաչատուրովը կալանավորված է։ 

«Գլխավոր դատախազը ներկայացնում է՝ իր համար հանցավոր մեխանիզմը հասկանալի է, այն է, որ Խաչատուրովի անունով չի գրանցվել, խեղաթյուրվել է իրական գնորդը։ Բայց գնորդի իրական կամ ոչ իրական լինելը իրավաբանական նշանակություն չունի այստեղ։ Դա ուղղակի ասված խոսք է՝ հանրության ընկալման տիրույթում որոշակի մանիպուլյացիա անելու տեսակյունից, այսինքն՝  տպավորություն է ստեղծվում, թե  գաղտնի գործարք է տեղի ունեցել, մարդու անունը փոխել են, ուրիշ մարդ է հանդես եկել, մինչդեռ Գրիգորի Խաչատուրովն այդ գույքը ձեռք բերելու որևէ խոչընդոտ չուներ։ Առկա են դեպքեր, երբ ՊՆ ներկայացուցիչները վաճառված գույքերից ձեռք են բերել»,- ասաց Հակոբ Ենոքյանը։

Ասուլիսին ներկա պաշտպան Միհրան Պողոսյանը նշեց, որ փաստերը չեն համապատասխանում նրան, ինչ հրամցնում են հասարակությանը։

Նա նշեց, որ  բացարձակ սուտ է նաև զորամասի դիմաց 18 միլիոն դրամ ստանալու հանգամանքը․ «Բացարձակ սուտ տեղեկություն է։ Ով կասի, որ այդ գույքը գրավադրելու արդյունքում 18 միլիոն դրամ գումար է ստացվել՝ կամ չի տիրապետում փաստերին, կամ դիտավորյալ սուտ տեղեկություն է հրամցնում հանրությանը,  կամ քողարկված այլ նպատակ կա։

18 միլիոն ընդհանրապես գոյություն չունի։ Գլխավոր դատախազ Աննա Վարդապետյանը շատ քաջ տիրապետում է այդ փաստական տվյալներին, որ 18 միլիոն գոյություն չունի։

3-րդ բանակային կորպուսի նախկին հրամանատար նշանակվելուց հետո Խաչատուրովը Վանաձորում բնակվելու անհրաժեշտությամբ 24 հազար դոլարանոց բնակարան ձեռք բերելու համար դիմել է  բանկին վարկ ստանալու համար։ Վանաձորում 24 հազար դոլարով գույք ձեռք բերելու համար գրավադրել է իր սեփական ձեռքբերելիք բնակարանը։ Բանկը տրամադրել է 18 միլիոն դրամի վարկային գիծ, որից օգտագործվել է ընդամենը 24 հազար դոլարը՝ 12 միլիոն 852 հազար դրամը, որն անմիջապես փոխանցվել է վաճառողին որպես բնակարանի ձեռքբերման արժեք։ Այս փաստերը վարույթ իրականացնող մարմինը, Աննա Վարդապետյանը փետրվարի 7-ին իրենց տրամադրության տակ ունեցել են։ Պատգամավորների հարցերին պատասխանելուց հերիք չէ անամոթաբար նշում է՝ 18 միլիոնի չափով է եղել վարկը, որը որ զորամասը վեր են ածել գումարի, մի հատ էլ  ասում է՝ այդ ուղղությամբ քննությունը չենք արել, չենք պարզել՝ ուր է գնացել։ Պայմանագրում հստակ երևում է»։

Հ. Ենոքյանը շարունակեց. «Ձեռքբերվելիք բնակարանի գրավով  գումար է վերցվել, բնակարանը ձեռք է բերվել։ Դրանից հետո  բանկն արդեն կնքված պայմանագրի համար լրացուցիչ գրավ է պահանջել։ Որպես ազատ անշարժ գույք, որպես լրացուցիչ գրավ, դրվել է այդ հողամասի տարածքը, որը ձեռք է բերվել Էդգար Արշակյանի կողմից, ով Խաչատուրովի շատ մտերիմ ընկերն է, բարեկամն է։

Կարևորագույն հանգամանքն այն է, որ այս զորամաս համարվող անշարժ գույքի գրավով գումար ձեռք չի բերվել, ընդամենը դրվել է որպես լրացուցիչ գրավ։

Փողերի լվացման հիմնական հատկանիշը հենց  գույքի իրական էությունը խեղաթյուրել է։ Այստեղ նույնիսկ նպատակային նշանակությունը մինչև հիմա չի փոփոխվել, նույն սեփականատիրոջ անունով է»։ 

Միհրան Պողոսյանն ասաց. «Այս իշխանությունը գենետիկ անհանդուրժողականություն ունի իր կարծիքին չհամաձայնող, իր որոշումներին ընդդիմացած անձանց հետ, թուրքին հաղթած ցանկացած անձի նկատմամբ։ Այստեղ այլ տարբերակ չկա։ Այն, որ ասում են՝ հիմա Հայաստանում բացառված է գործ կարելը կամ... փաստացի այս գործի շրջանակներում,  Էդգար Արշակյանին պատկանող հողամասը տանում, գցում են Գրիգորի Խաչատուրովի գրպանը։ Ուրիշ ոչ մի բան տեղի չի ունենում։ Գործ կարելը պոզով-պոչով չի լինում։ Հենց սա է այն, որ գործ են կարում։ Իրավաբանները շատ լավ գիտեն, որ այստեղ փողերի լվացման հանցակազմ չկա։

Նախկինում՝ 1990-ականներին թմրանյութ էին գցում գրպանը, հիմա հասել ենք այդ վիճակին,  որ հող են գցում»։

Մ. Պողոսյանի խոսքով, այս գործընթացի նպատակը հանցագործություն բացահայտելը, կանխելը չէ. «Սա ուղղակիորեն Գրիգորի Խաչատուրովի նկատմամբ իրականացվող անձնական հետապնդման մասին է խոսում»։

Հարցին՝ Գ. Խաչատուրովն այն գեներալներից է, ով 2021 թ. պահանջել է Նիկոլ Փաշինյանի հրաժարականը, արդյո՞ք այս քրեական գործը հենց այս հայտարարության հետևանք չէ, Մ. Պողոսյանն ասաց. «Ուղղորդված քննություն է, քրեաիրավական գործիքակազմի բացակայություն, տեսնում ենք՝ Խաչատուրովը կալանավորված։ Մեզ հարց ենք տալիս՝ ինչու։ 

Խաչատուրովն այն անձնավորությունն է, որ մի անգամ է մի բան ասում ու դա պահպանվում է  ողջ կյանքի ընթացքում. եթե երդում է  տվել ծառայել ՀՀ-ին, ծառայելու է  ՀՀ-ին, եթե պահանջում է  Փաշինյանի հրաժարականն ու հայտնում է, որ տանում են դեպի պետության կործանում, ժամանակը ցույց է տալիս, որ նա այդ բառերից չի հրաժարվում, այդ դիրքորոշման մեջ որևէ փոփոխություն տեղի չի ունեցել։

Այս քրեական գործն այս դրվագով հարցուվել է 2021 թվականի այդ հայտարարությունից հետո»։