Ձեր վստահելի աղբյուրը

«Երևանի երբեմնի կանաչը վերադարձվում է Երևանին»,-հայտարարում է Կանաչապատում և շրջակա միջավայրի պահպանություն» ՀՈԱԿ-ն ու էտի անվան տակ կտրում ծառերը։

Panorama.am-ի խմբագրությունը ծառահատման հերթական ահազանգն է ստացել քաղաքացուց։ Կոմիտաս 19/8 հասցեում տեղակայված շենքի բակում ծառ են հատել։ Ահազանգած քաղաքացին ասում է՝ ծառը չորացած չէր, անցած տարի սաղարթախիտ էր ու ամռան ամիսներին բնակիչներին պաշտպանում էր կիզիչ արևից։

Նա կասկած հայտնեց, որ ծառը կտրել են հարակից վարսավիրանոցի տիրոջ միջամտությամբ։



Խմբագրություն ահազանգած քաղաքացին անցած տարի էլ նկարել էր, թե ինչպես  ՀՈԱԿ-ի մի քանի աշխատակիցներ մեծ դժվարությամբ կտրել, ապա գետնել են կանաչ ծառը Կոմիտաս-Փափազյան փողոցների խաչերուկում։

Երևանում խոր էտի ու հատված ծառերի ահազանգեր ստացվում են գրեթե ամեն օր։

«Մարտի 23-ից մեկնարկում է երկար սպասված` կենսունակության ավարտին մոտ գտնվող, կենսունակությունը կորցրած, դեֆորմացված ծառերի փոխարինումն առավել արժեքավոր, ֆունկցիոնալ, գեղատեսիլ ծառերով»,-հայտարարում է  «Կանաչապատում և շրջակա միջավայրի պահպանություն» ՀՈԱԿ-ը։

«Կարելի է իմանալ, ի՞նչ է նշանակում գեղազարդ և ֆունկցիոնալ (ես այս ԲԱՌԵՐԻ իմաստը գիտեմ), կարելի՞ է իմանալ ծառատեսակը կամ ծառատեսակները, արդյոք այդ ծառատեսակների նոր (երիտասարդ) տնկիները կկարողանան իրենց վրա վերցնել մեր քաղաքի օդի արդեն անտանելիին հասած կեղտոտվածությունը»,- ՀՈԱԿ-ի ֆեյսբուքյան էջում արձագանքել է երևանցիներից մեկը։

Կազմակերպությունից նշում են՝ այսուհետև հատման և փոխարինման ենթակա ծառերի վրա փակցված է լինելու ծառահատման տոմսով հաստատված գրություն: 



ՀՈԱԿ-ի նախկին ղեկավար Քրիստինա Վարդանյանն ուշադրություն է հրավիրում գրության ձևի վրա։




Արձագանքելով մտահոգություններին նա գրում է.

«Հաշվի առնելով բազմաթիվ նամակները և խնդրի լրջությունը, բոլորիդ կպատասխանեմ այստեղ։ Երևանի փողոցներում տասնյակ ծառերի վրա փակցված են ծանուցումներ՝ վերաբերող ծառերի զանգվածային հատմանը։ Կարծիքս խիստ բացասական է, քանզի այն, ինչ արվում է ունի բազմաթիվ բացեր և այսօրվա աղետալի էկոլոգիայի պայմաններում հղի է բավական մեծ ռիսկերով։ Կցված իրազեկման ծառահատման տոմսը չունի համար, ինչը փաստաթղթավորման կոպիտ խախտում է, քանզի պարզ չէ որ ծառի մասին է խոսքը և գտնել նրան բազայում անհնարին է։

2020-ի հուլիսից ներդրված գործող իրազեկման լամինացված տարբերակը տեղադրում եմ ստորև։
Երկրորդը՝ տոմսում նշված պաշտոնյան, Դ. Համբարյանը, արդեն 6 ամիս է, ինչ ՆԳ փոխնախարար է և լիազորություն չունի քաղաքապետարանում։

Ծառերի դեֆորմացված սաղարթը հատման ցուցում չէ, ինչի վառ ապացույցն է նկարում ներկայացված՝ համապատասխան գործիքով գրագետ ձևավորված, մանրատերև թեղին, որը աճում է ՄԱԿ-ի գրասենյակի հարակից տարածքում։ Այլ հարց է խորը վնասվածքներ ունեցող, հիվանդ անկենսունակ բույսերը։ Ծառերը աշխարհի բոլոր քաղաքներում փոխարինվում են, բայց ոչ բարձրասաղարթ, չորադիմացկուն ու միջավայրի աղտոտման նկատմամբ կայուն տեսակները, ներմուծված դեկորատիվ և մեծ խնամք պահանջող տեսակներով։

Բացարձակ անհասկանալի էր 15.03. Արշակունյաց պողոտայում՝ քաշաքի ամենաաղտոտված հատվածում, երեք խոշոր կենսունակ թեղիների հատումը (նկարները կցված են), բայց միգուցե կառույցը հիմնավոր պարզաբանում տա։ Դիմել եմ պաշտոնապես։ Իսկ սակուրայով թեղին չեն փոխարինում, նրանք ոչ սաղարթ են ապահովելու, ոչ էլ Կասկադում հիգիենիկ խնդիր են լուծելու։

Կանաչապատումը գործիք է, խնդիրը՝ միջավայրի պահանջից ելնելով, մասնագետն է դնում։ Ակամա հիշեցի, թե ինչպես տարիներ առաջ Իսակովի պողոտայի, կաղնիների արանքում՝ հետագա փոխարինման նպատակով, գնդաձև ակացիաներ էին տնկել։ Ուղղակի հուշող չկար, որ կաղնին հարյուրամյակներ է ապրում, իսկ ակացիան՝ տասնամյակներ ու պողոտայի ծառ չէ»։