Ձեր վստահելի աղբյուրը

«Այս պահի դրությամբ որևէ կարգավորում չկա հեռուստաալիքների հերթականության հետ կապված և երբ հեռուստացույց եք միացնում, անկախ նրանից՝ դա որևէ կաբելային օպերատորի միջոցով եք դիտում, թե սովորական հեռուստացույցի թվային ընդունիչով, կարգավորում չկա»,-խորհրդարանում հայտարարեց ՔՊ-ական պատգամավոր Սիսակ Գաբրիելյանը՝ զեկուցելով իր հեղինակած «Տեսալսողական մեդիայի մասին» օրենքում փոփոխություն և լրացում կատարելու մասին օրենքի նախագիծը:

Նա հայտարարեց, թե հեռուստաալիքների օպերատորների մոտ հաճախ հանրային մուլտիպլեքսում առկա հեռուստաընկերությունները տեղ չեն գտնում առաջին տասնյակում, բայց չլիցենզավորված հեռուստաընկերություններ հայտնվում են կաբելային հեռուստաընկերությունների առաջին տասնյակում:

Նախագծով առաջարկվում է կարգավորել օպերատորների մատուցող հեռուստաալիքների հերթականությունը:

«Առաջին հերթին նախապատվությունը տրվելու է հանրային հեռարձակողներին, հետո՝ հանրապետական սփռում ունեցողներին, մայրաքաղաքային սփռում ունեցողներին»,-ասաց Գաբրիելյանը:

Նա հայտարարեց, որ  նախագծով մարզային հեռուստաընկերությունները կլինեն մայրաքաղաքային սփռում ունեցող ընկերություններից հետո:

Արձանագրենք, որ նախագծով բոլոր հեռուտաօպերատորներին պարտադրվում է հեռուստաալիքների առաջին հորիզոնականում ապահովալ Հանրային Հեռուստաընկերությանը, ինչը նախկինում օպերատորների հայեցողությամբ էր արվում և հիմնականում նախապատվությունը տրվում էր այլ ընկերություններին: