Ադրբեջանում ավելի է սրվել հայատյացության քարոզը, բայց մենք համառորեն շարունակելու ենք բանակցել. Արարատ Միրզոյան
«Մի կողմից ընթանում է բանակցային գործընթաց, ինչպիսին, օրինակ, խաղաղության պայմանագրի շուրջ ընթացող գործընթացը, մյուս կողմից մենք տեսնում ենք Ադրբեջանի և ավելի սրվող հռետորաբանությունը, և սպառնալիքները, գետնի վրա ագրեսիվ գործողությունները»,-Ազգային ժողովում կառավարության հետ հարցուպատասխանի ժամանակ ասաց արտաքին գործերի նախարար Արարատ Միրզոյանը։
Նա նշեց, որ դրան ականատես են եղել 2022 թ. սեպտեմբերի 13-14-ին, երբ Ադրբեջանը ներխուժեց ՀՀ ինքնիշխան տարածք, Լաչինի միջանցքի փակմամբ և, ըստ այդմ, ԼՂ շրջափակմամբ։
«Այս երևույթը շարունակվում է։ Ավելին, վերջին շրջանում էլ ավելի է սրվել թե հայատյացության քարոզը, թե ուղղակի սպառնալիքները»,- ասաց Միրզոյանը՝ հիշեցնելով Ալիևի հայտարարությունը, որ խաղաղության պայմանագիր չի լինելու, ՀՀ-ում իրենց 29 հազար քկմ հանգիստ չեն ապրելու, եթե չընդունեն ամբողջությամբ Ադրբեջանի պայմանները։
«Այս ուլտիմատիվ կեցվածքը կա, այս հռետորաբանությունը կա, միաժամանակ խաղաղության պայմանագրի շուրջ բանակցությունները շարունակվում են»,- ասաց նա։
Ա. Միրզոյանը հայտնեց, որ ստացել են ադրբեջանական առաջարկներ, աշխատում են դրանց վրա, առաջիկայում, բնականաբար, կլինի հայկական կողմի արձագանքն ու առաջարկները։
«Նշած հռետորաբանությունն ու ագրեսիվ կեցվածքը ոչ միայն չեն նպաստում խաղաղության գործընթացին, այլ նոր-նոր խոչընդոտներ են ստեղծում այդ գործընթացի ճանապարհին։
Բայց մեր դիրքորոշումը չի փոխվել, մենք հաստատակամ ենք, համառորեն շարունակելու ենք, անկեղծորեն շարունակելու ենք բանակցել՝ նպատակ ունենալով տարածաշրջանում երկարատև և կայուն խաղաղություն հաստատել»,- ասաց Միրզոյանը։
Նա նաև նշեց, որ իրենք չեն բանակցում Լաչինի միջանցքում ադրբեջանական անցակետ դնելու շուրջ։
«Հայաստանը համարում է, որ Լաչինի միջանցքի և նրա ռեժիմի շուրջ բանակցությունները վաղուց ավարտվել են, կարգավորումները տեղ են գտել 2020 նոյեմբերի եռակողմ հայտարարության մեջ, ըստ որի՝ Լաչինի միջանցքը մնում է ռուսական խաղաղապահ ուժերի վերահսկողության տակ և Ադրբեջանը երաշխավորում է այդ միջանցքով երկկողմ անխափան երթևեկությունը։ Սա ամրագրված պայմանավորվածություն է։
Մենք այստեղ պետք է արդեն կասկած հայտնենք ընդհանրապես հետագա բանակցությունների նպատակահարմարության վերաբերյալ, այսինքն՝ ինչ իմաստ ունի ձեռք բերել անընդհատ այլ հարցերի շուրջ պայմանավորվածություններ, եթե դրանք որոշ ժամանակ հետո անպայմանորեն խախտվելու են Ադրբեջանի կողմից և Ադրբեջանը նույն այդ հարցի շուրջ հանդես է գալու նոր, ավելի կոշտ պահանջներով»,- ասաց Արարատ Միրզոյանը։
Հարակից հրապարակումներ`
- Արդյոք Բլինքենը Ալիևի հետ զրույցում բարձրացրել է Ադրբեջանում մարդու իրավունքների հետ կապված հարցեր
- Ի վերջո ի՞նչ է գրված այդ «Խաղաղության պայմանագրում». Սոս Հակոբյան
- Վիգեն Հակոբյան. Փորձեցին խաղից հանել ռուսներին, բայց որևէ մեկը չի ցանկանում երաշխավոր կանգնել խաղաղության պայմանագրին
- Հարավային Կովկասում խաղաղության միակ ճանապարհը դիվանագիտությունն է. Բլինքեն
- Ա. Միրզոյան. Ադրբեջանը տորպեդահարում է տարածաշրջանում երկարաժամկետ խաղաղության և կայունության հաստատման ջանքերը
- Վարդան Ոսկանյանը Ալիևին հուշել է, թե երբ են Նովրուզի կրակը վառում
- Աբրահամ Գասպարյան. Ալիևի հայտարարությունը յուրահատուկ ստուգատես է հայաստանյան քաղաքական մտքի համար
- Ի՞նչ է սպառնացել Ալիևն օկուպացրած Թալիշից
- Ալիևի ելույթը հերթական ագրեսիայի նախապատրաստման բացահայտ դրսևորում էր. ՀՀ ԱԳՆ
- Բոնոն և Ալիևը գոհունակություն են հայտնել Հայաստանի և Ադրբեջանի ղեկավարների մյունխենյան հանդիպումից
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
