Ձեր վստահելի աղբյուրը

Թուրքիայի երեք ընդդիմադիր կուսակցության ներկայացուցիչներ դիմում են ներկայացրել Բարձրագույն ընտրական հանձնաժողով՝ նախագահ Ռեջեփ Թայիփ Էրդողանին առաջիկա նախագահական ընտրություններում թեկնածուների ցուցակից հանելու խնդրանքով։ ՏԱՍՍ-ի փոխանցմամբ՝ այդ մասին երեքշաբթի հայտնել է Habertürk հեռուստաալիքը։

«Լավ» , «Ժողովրդավարություն և բեկում» և «Հայրենիք» կուսակցությունները պնդում են, որ Էրդողանը չի կարող կրկին առաջադրվել որպես նախագահ: Սա, ըստ նրանց, հակասում է սահմանադրությանը։

Թուրքիայի ընդդիմության ներկայացուցիչները պնդում են, որ Էրդողանի հերթական առաջադրումը որպես նախագահի թեկնածու հակասում է սահմանադրությանը, քանի որ նրա ներկայիս ժամկետը անընդմեջ երկրորդն է։ Սակայն թուրքական իշխանությունները դա բացատրում են նրանով, որ 2017 թվականին կայացած սահմանադրական հանրաքվեից հետո Էրդողանի նախագահական ժամկետները զրոյացվել են։ Թուրքիայի նախագահը կարծիք է հայտնել, որ ընդդիմությունը վախենում է առաջիկա ընտրություններում պարտվելուց, ուստի նա սկսել է այս թեման բարձրացնել միայն հիմա։

Թուրքիայի արդարադատության նախարարության ղեկավար Բեքիր Բոզդաղը նույնպես հայտարարել է, որ Էրդողանն առաջիկա նախագահական ընտրություններում իր թեկնածությունն առաջադրելու համար իրավական խոչընդոտներ չունի։ Նա դա պատճառաբանում է նրանով, որ 2018 թվականին Թուրքիայի նախագահական կառավարման ձևին անցնելուց հետո Էրդողանի ներկայիս ժամկետն առաջինն է։