15 զինծառայողի ծնողները չեն բացառում դիակների դատաբժշկական կրկնակի փորձաքննության պահանջը

Իրավունք 14:53 29/03/2023 Հայաստան

15 զինծառայողի ծնողները չեն բացառում դիակների դատաբժշկական կրկնակի փորձաքննության պահանջը

«Եթե պաշտոնական վարկածով պնդում է արվում, որ հրդեհը բռնկվել է բենզինի օգտագործումից առաջացած բոցից, հարց է առաջանում, թե ինչ շմոլ գազի մասին է խոսքը, շմոլ գազը երբվանից է առաջացել, ինչ հանգամանքներում, ինչ միջոցների կիրառման արդյունքում և հրդեհից առաջ ինչ իրավիճակ է տիրել այդ տարածքում»,-ասուլիսում հայտարարեց Գեղարքունիքի մարզի Ազատ գյուղում տեղակայված ինժեներասակրավորկան վաշտի հրդեհից զոհված 15 զինծառայողների իրավահաջորդների շահերն ներկայացնող փաստաբան Նորայր Նորիկյանը:

Փաստաբանն ասաց, որ տրված եզրակացությունները, գործում առկա փաստական հանգամանքները հակասության մեջ են գտնվում, ավելի շատ հարցեր են առաջացրել, քան՝ պատասխաններ:

Նրա խոսքով՝ զինծառայողների ծնողները չեն բացառում դիակների դատաբժշկական կրկնակի փորձաքննություն իրականացնելը, և սպասում են նշանակված հրդեհատեխնիկական, պայթյունատեխնիկական, շինարարատեխնիկական համալիր փորձաքննության եզրակացությունները, որոնք այլ ապացույցների հետ վերլուծելուց հետո նրանք հանդես կգան նման միջնորդությամբ։

Ասուլիսին ներկա զոհված զինծառայողների ծնողները հայտարարեցին, որ փաստերի բազմաթիվ հակասությունները խոսում են այն մասին, որ իշխանությունները ցանկանում են գործը ծածկադմփոց անել: Զոհված զինծառայող Կիրակոսյանի հայրը վրդովմունք հայտնեց, որ Նիկոլ Փաշինյանը դեպքի նույն օրը վարկած է հրապարակում, որն էլ մինչ օրս փորձում են առաջ տանել իրավապահները:

Ծնողները նաև վրդովվեցին որ Թուրքիայի երկրաշարժի զոհերի համար «լացող» ՀՀ վարչապետը, ոչ մի կարեկցնաք չի դրսևորել 15 զոհվածների փաստով և նույն օրն Իջևանում ուրախ միջոցառման է մասնակցել:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: