Ձեր վստահելի աղբյուրը

«Փետրվարի 1-ի դրությամբ, կենսաթոշակառուների վճարների 17.5 %-ն իրականացվում է անկանխիկ»,-կառավարության նիստում հայտնեց ԿԲ նախագահ Մարտին Գալստյանը:

Նրա խոսքով՝ հայաստանյան բանկերի թողարկած քարտերի միջոցով անկանխիկ վճարումներն անցած տարվա ընթացքում գերազանցել են 1.3 տրիլիոն դրամը, որը նախորդ տարվա նույն ցուցանիշի համեմատ 58%-ով ավել է: 

Նիկոլ Փաշինյանն էլ իր կողմից նշեց. «Փետրվարին մեր սիրելի թոշակառուներն անկանխիկ եղանակով իրականացրել են 3.4 միլիարդ դրամի առևտուր»։

Նա հիշեցրեց, որ 2022-ին այդ ցուցանիշը ձգտում էր 0-ի, իսկ դեկտեմբերին ու հունվարին 2.7 միլիարդ դրամի շրջանակներում էր:

«Փետրվարի համար առևտրի արդյունքում պետությունը 286 միլիոն 711 հազար վերադարձնում է առևտուր իրականացնող կենսաթոշակառուներին։Կենտրոնական բանկի ներկայացրած տվյալների համաձայն՝ եթե 2022 թվականի հունիսի վերջի դրությամբ ՀՀ-ում կար շուրջ 22 հազար ակտիվ POS տերմինալ, ապա, այսօրվա դրությամբ, դրանց թիվը եռապատկվել է»,-հայտնեց Փաշինյանը։

Նա անդրադարձավ նաև  ապրիլի 1-ից նախատեսված ԱՊՊԱ համակարգի շուկայի ազատականացմանը՝ հիշեցնելով, որ դրա նախաձեռնությունը սկսվել է նրանից, որ խնդիր է դրվել պետական հատվածի բոլոր հիմնարկությունների ավտոմեքենաների պարտադիր ապահովագրությունը կատարել մրցութային կարգով:

«Երբ հետազոտել ենք, տեսել ենք, որ այդտեղ կան պրոբլեմներ, որովհետև, ըստ էության, սահմանված են գները ի սկզբանե, և շուկայական մոտեցում չկա»,-հայտնեց Փաշինյանը՝ ներկայացնելով փոփոխությունների նախապատմությունը, և հավելեց. «Շատ լուրջ ինստիտուցիոնալ բարեփոխում է, որի արդյունքները կվայելեն նաև ՀՀ ամենակարգապահ քաղաքացիները՝ երթևեկության կանոնների պահպանման իմաստով»:

ԿԲ նախագահ Մարտին Գալստյանն էլ հայտնեց, որ քաղաքացիներն ապրիլի 1-ից առցանց հարթակով ԱՊՊԱ պայմանագիր կնքելիս միաժամանակ տեսնելու են բոլոր ապահովագրական ընկերությունների գնառաջարկները և կարող են ընտրել իրենց համար լավագույն գին-որակ հարաբերակցությունը:

«Այլևս ոչ մի գերատեսչություն իրավունք չունի ԱՊՊԱ պայմանագիր կնքել առանց մրցույթի»,-հայտարարեց Նիկոլ Փաշինյանը: