Ձեր վստահելի աղբյուրը

«Լաչինի միջանցքի հետ կապված երկրորդ զարգացումներն կապված են երթուղու փոփոխության հետ: Ինչպես տեղյակ եք՝ 2022 թվականի օգոստոսին Ադրբեջանի ու  ԼՂ իշխանությունների միջև կայացած համաձայնության արդյունքում՝ Լաչինի միջանցքի երթուղին փոխվեց նոր ճանապարհի գործարկմամբ, բայց քանի որ Լաչինի միջանցքը Հայաստանին կապող   ճանապարհն ամբողջությամբ պատրաստ չէր, գործարկվեց ժամանակավոր երթուղի, որը մուտք էր գործում ՀՀ տարածք Կոռնիձորի կամրջով, ապա նորից Ադրբեջանի տարածք, ապա նորից ՀՀ տարածք»,-կառավարության նիստում հայտարարեց Նիկոլ Փաշինյանը։

Տեղեկացնելով որ ձեռք բերված պայմանավորվածությամբ այդ  երթուղին պետք է գործեր մինչև 2023 թվականի ապրիլի 1-ը՝ Փաշինյանն ասաց. «Նախօրեին մենք ադրբեջանական կողմին տեղեկացրել ենք, որ, համաձայն պայմանավորվածության, Կոռնիձորի կամրջից հետո ճանապարհը շարունակվելու է միայն ՀՀ տարածքով և ՀՀ սահմանապահ զորքերը ստանձնելու են այդ հատվածում ՀՀ պետական սահմանի պահպանությունը։ Ընդգծեմ, որ սահմանապահ զորքերը տեղակայվելու են ՀՀ պետական սահմանի այն նույն դիրքերում, որտեղ մինչ օրս ՊՆ ստորաբաժանումներն էի տեղակայված»։

ՀՀ գործադիրի ղեկավարը տեղեկացրեց, որ այսօր առավոտյան ադրբեջանական լրահոսում հայտնվել են տեղեկություններ, որոնք փորձ են անում տեղի ունեցածը ներկայացնել որպես հերթական «բլոկբաստեր» և շեշտեց, որ հայկական դիրքերի որևէ փոփոխություն տեղի չի ունեցել։

«Կրկնում եմ՝ հայկական դիրքերի որևէ փոփոխություն այս ամենի արդյունքում տեղի չի ունեցել այն տարբերութամբ, որ մենք մտադիր ենք  խնդրո առարկա հատվածի պահպանությունը, ի տարբերություն նախկինի, իրականացնել սահմանապահ զորքերի միջոցով։ Այսինքն՝ փոփոխությունը, որ տեղի է ունենում, հետևյալն է՝  նույն դիրքերից ՀՀ պետական սահմանի երկայնքով ՊՆ-ի ստորաբաժանումները դուրս են գալու, նրանց  փոխարեն տեղակայվելու են սահմանապահ զորքերը, մենք նույնն առաջարկել ենք Ադրբեջանին, որպեսզի նույնը տեղի ունենա Ադրբեջանի կողմից, հույս ունեմ, որ գործընթացը տեղի կունենա առանց սադրանքների»,-հայտնեց Փաշինյանը և շեշտեց, որ ՀՀ կառավարությունը, չնայած դժվարություններին, վերահաստատում է իր հավատարմությունն խաղաղության օրակարգին՝ հույս հայտնելով, որ առաջիկայում տեղաշարժեր կլինեն ինչպես Ստեփանակերտ-Բաքու, այնպես էլ Երևան-Բաքու բանակցային ձևաչափերում:

Նա նկատեց, որ Ստեփանակերտ-Բաքու բանակցային ձևաչափում միջազգային պատշաճ մեխանիզմների գործարկումն չափազանց կարևոր է։