Ձեր վստահելի աղբյուրը

Եվրամիությունը ժողովրդագրական մեծ փոփոխությունների եզրին է, քանի որ նոր կանխատեսումները վկայում են դարավերջին բնակչության զգալի նվազման մասին: Եվրոստատի գնահատմամբ, մինչև 2100 թվականը բնակչության թիվը կարող է նվազել 6 տոկոսով կամ 27,3 մլն մարդով։

Եվրանյուզը գրում է, որ COVID-19 համաճարակի պատճառով երկու տարվա անկումից հետո ԵՄ բնակչությունը սկսել է վերականգնվել 2022 թվականին և այս տարվա սկզբին հասել է 451 միլիոնի։ Այս աճը մեծապես պայմանավորված է ուկրաինացի փախստականների զանգվածային հոսքով։

ԵՄ վիճակագրական ծառայության վերջին զեկույցի համաձայն, Եվրամիության բնակչությունը կշարունակի աճել՝ 2026 թվականին հասնելով 453 միլիոնի, իսկ մինչև 2100 թվականը կնվազի մինչև 420 միլիոն։

Կանխատեսումը կատարվել է մայրցամաքում ծնունդների, մահերի և միգրացիայի վերաբերյալ տվյալների հիման վրա։

Եվրոպան 2100 թվականին. ի՞նչ է սպասվում

Կանխատեսվում է, որ 2100 թվականին կլինի փոքրացող և ծերացող հասարակություն։ Կնվազի երեխաների, մինչև 20 տարեկան երիտասարդների և աշխատունակ տարիքի մարդկանց համամասնությունը, իսկ 65 և բարձր տարիքի մարդկանց համամասնությունը կաճի։
2100 թվականին 65 և բարձր տարիքի մարդիկ կկազմեն բնակչության 32 տոկոսը՝ 2022 թվականի 21 տոկոսի դիմաց։

Կանխատեսվում է, որ ժողովրդագրական բուրգը վերևում շատ ավելի լայն տեսք կունենա, քան այսօր, որտեղ 80 տարեկանից բարձր ավելի մարդիկ կլինեն, քան 20 տարեկանից ցածր մարդիկ:

ԵՄ բնակչությունն ավելի երկար է ապրում և ծերանում

65 և ավելի տարեկան բնակչության մասնաբաժինը ԵՄ անդամ բոլոր երկրներում արդեն աճում է և իրականում շատ առաջ է Չինաստանից, որտեղ այն կազմում է մոտ 13 տոկոս:

Ըստ վերջին տվյալների, 65 և բարձր տարիքի բնակչության ամենաբարձր համամասնությամբ երկրներն են Իտալիան (22,5 տոկոս), որին հաջորդում են Ֆինլանդիան (22,7 տոկոս), Հունաստանը (22,5 տոկոս), Պորտուգալիան (22,4 տոկոս) և Գերմանիան (22 տոկոս)։

Եվրոստատի կանխատեսումների համաձայն, 65-ից 79 տարեկան մարդիկ 2100 թվականին կկազմեն ԵՄ ընդհանուր բնակչության 17%-ը՝ 2022 թվականի սկզբի 15%-ի դիմաց։ Ակնկալվում է, որ 80 և բարձր տարիքի մարդկանց համամասնությունը նույնպես կկրկնապատկվի՝ 6 տոկոսից հասնելով մինչև 15 տոկոսի։