Ձեր վստահելի աղբյուրը

Քաղաքական-հասարակական գործիչ Ավետիք Չալաբյանը հրապարակել է ՀՀ պաշտպանության նախարարության ավելի վաղ հրապարակած տեսանյութը,  թե ինչպես են Ադրբեջանի ԶՈՒ զինծառայողները մոտենում  ինժեներական աշխատանքներ իրականացնող ՀՀ ԶՈՒ զինծառայողներին ու գրել.

«Այս տեսանյութում հստակ երևում է, թե ինչպես է թշնամական մեքենան անարգել մոտենում նոր դիրքեր կահավորող մեր զինվորականներին, սադրանք սարքում, որն ավարտվում է փոխհրաձգությամբ: Տեսանյութից նաև ակնհայտ է, որ թշնամին առոք-փառոք տեղավորվել է մեր տարածքում, մեր զինվորականներից տառացիորեն 100 մետրի վրա, և այս իրավիճակը հղի է նոր սադրանքներով:

Այս ամենը անթույլատրելի է, և արդյունք է գործող վարչակարգի կողմից թշնամու նկատմամբ շարունակական թողտվության, որի համար իրենց արյունով են հատուցում մեր զինծառայողները: Այս ամենին պետք է վերջ տրվի, թշնամին ջախջախվի և դուրս շպրտվի մեր հողից»։ 

Հիշեցնենք՝ ավելի վաղ ՊՆ-ից հայտնել էին, որ ապրիլի 11-ին՝ ժամը 16:00-ի սահմաններում, Ադրբեջանի ԶՈՒ ստորաբաժանումները  կրակ են բացել Տեղ համայնքի ուղղությամբ ինժեներական աշխատանքներ իրականացնող  ՀՀ ԶՈՒ զինծառայողների ուղղությամբ: Հայկական կողմը դիմել է պատասխան գործողությունների: Ժամը 17:30-ի սահմաններում նույն ուղղությամբ Ադրբեջանի ԶՈՒ ստորաբաժանումները կիրառել են ականանետային  միջոցներ: ԶՈՒ ստորաբաժանումները ձեռնարկել են անհրաժեշտ պաշտպանական միջոցներ: Ադրբեջանական սադրանքի հետևանքով, հայկական կողմն ունի 4 զոհ և 6 վիրավոր: