Ձեր վստահելի աղբյուրը

«Մենք բոլորս միասին չկարողացանք գտնել մեկին, որը մարդու իրավունքների պաշտպանությամբ զբաղվել է տարիներ շարունակ՝ անկախ նրանից՝ կհավանե՞նք նրա գործունեությունը, թե՞ ոչ, կսիրե՞նք նրան, թե՞ ոչ»,- Ազգային ժողովում ՀՀ Մարդու իրավունքների պաշտպանի ընտրության ժամանակ ասաց «Հայաստան» խմբակցության պատգամավոր Գեղամ Նազարյանը։

Հիշեցնենք, որ ԱԺ-ում քննարկվում է ՄԻՊ պաշտոնում  ՔՊ առաջադրած թեկնածու, գլխավոր դատախազի տեղակալ Անահիտ Մանասյանի թեկնածությունը։

Գ. Նազարյանը նշեց, որ ցանկանում է ՄԻՊ-ը լինի ազատ, անկաշկանդ, անկախ,  չվարանի այս կամ այն երևույթի վերաբերյալ իր տեսակետներն արտահայտելուց:

«Երբ հայտնի դարձավ, որ «Քաղաքացիական պայմանագիր»-ն առաջադրում է մի մարդու, ով այս պահին աշխատում է գլխավոր դատախազությունում, ինձ մոտ արդեն մտավախություն առաջացավ, որովհետև դա, իրոք, կաշկանդող հանգամանք է»,- ասաց ընդդիմադիր պատգամավորը։

Ընդդիմադիր պատգամավորը նշեց, որ ուզում է հասկանալ, թե ինչպես է եղել Ա. Մանասյանին՝ ՄԻՊ թեկնածու առաջարկելու պրոցեսը. «Հնչել է զանգ, կանչել են, հրավիրել են, ասել են՝ գիտեք, ձեզ համար նոր գործ ենք գտել, դուք համաձայվել եք կամ գուցե ասել են՝ համաձայնվենք, որոշեք, բայց  հաստատ ձեր գործունեության ընթացքում դուք  մարդու իրավունքների պաշտպանության չեք զբաղվել։ Ես էլ չեմ զբաղվել ու ինձ առաջարկելու դեպեքում ես կմերժեի։ Սա ձեզ չի վերաբերվում, պետության, մեր  բոլորի խնդիրն է, որ մենք բոլորս միասին չկարողացամք գտնել մեկին, որը մարդու իրավունքների պաշտպանությամբ զբաղվել է տարիներ շարունակ՝ անկախ նրանից՝ կհավանե՞նք նրա գործունեությունը, թե՞ ոչ, կսիրե՞նք, թե՞ ոչ: Բայց այսպես մենք մի քանի ամիս հետո ունենալու ենք այլ հերթական նշանակում, քանի որ այս ձևով մենք ՄԻՊ կառույցը վերածում ենք դատախազությանը կից կառույցի, դուստր ձեռնարկության: Այսպես մենք հեռու չենք գնա: Այսպես ՄԻՊ ինստիտուտը չի կայանա»։

Այնուհետև նա դիմեց Ա. Մանասյանին. «Դուք  ո՞նց եք պաշտպանելու մարդու իրավունքները, երբ որ գնահատական տալուց կաշկանդված եք, չեք կարող ասել, որ բռնությունը դատարապտում եք»։

«Ես լսել եմ, որ որպես մասնագետ շատ լավ մասնագետ եք։ Հիմա պետությունը կորցնում է լավ մասնագետի, որն իր տեղում պետք է լիներ, իր տեղում աշխատեր, բայց, կրկնում եմ, սա ձեր մեղավորությունը չէ, սա մեր բոլորի մեղավորությունն է, որ երեք խմբակցություններով չկարողացանք գտնել Մարդու իրավունքների իսկական պաշտպան», - ասաց Գեղամ Նազարյանը։