Ձեր վստահելի աղբյուրը

Ազգային ժողովը փակ գաղտնի քվեարկությամբ համաձայնություն տվեց «Հայաստան» խմբակցության պատգամավոր Մհեր Սահակյանի նկատմամբ հանրային քրեական հետապնդում հարուցելուն։

Քվեարկությանը մասնակցել էր 65 պատգամավոր, բոլորն էլ կողմ են քվեարկել: 

Գլխավոր դատախազ Աննա Վարդապետյանը ընդդիմադիր պատգամավոր Մհեր Սահակյանի նկատմամբ քրեական հետապնդում հարուցելու (նրան մեղադրանք առաջադրելու) միջնորդագիր էր ներկայացրել Ազգային ժողով, որը քննարկվել էր նախօրեին։

Հիշեցնենք, որ մարտի 31-ին ԱԺ-ում տեղի ունեցած քաշքշուկն ավարտվել էր նրանով, որ ընդդիմադիր պատգամավորը հարվածել էր ՔՊ-ական Վլադիմիր Վարդանյանի դեմքին։ Վերջինս դիմել էր «Նաիրի» ԲԿ, իսկ ընդդիմադիր պատգամավորը ձերբակալվել էր։
ՔԿ-ից հայտնել էին, որ մարտի  31-ին՝ ժամը 11:15-ի սահմաններում, ՀՀ Ազգային ժողովի 3-րդ հարկի թիվ 314 նիստերի դահլիճում պատգամավորների մասնակցությամբ կազմակերպված փակ աշխատանքային քննարկման ընթացքում «Հայաստան դաշինք» խորհրդարանական խմբակցության պատգամավոր Մհեր Սահակյանը անհիմն դիտողություն է կատարել ՀՀ ԱԺ պատգամավոր Վլադիմիր Վարդանյանին՝ բարձր տոնով խոսելու համար, ապա մոտեցել և աջ ձեռքում գտնվող ինչ-որ առարկայով մեկ անգամ հարվածել է Վ. Վարդանյանի ձախ հոնքին, որի արդյունքում վերջինս վայր է ընկել։