Ձեր վստահելի աղբյուրը

Նախօրեին Սյունիքի մարզի Տեղ համայնքում թշնամու հարձակման հետևանքով զոհված Նարեկ Սարգսյանը Սևան քաղաքից է։ Նարեկը հատուկ ջոկատային է եղել։

Սևանի համայնքապետարանի աշխատակազմի քարտուղար Արմինե Ղուկասյանը Panorama.am-ի հետ զրույցում Նարեկ Սարգսյանին բնութագրեց մարդկային և մասնագիտական բարձր որակներ ունեցող զինվորական, ընտանիքին, համայնքին ու հայրենիքին նվիրված երիտասարդ, ում 29 տարեկանը կլրանար հունիսին։

«Չնայած երիտասարդ տարիքին, Նարեկը կարողացել է շատ բան անել մեր երկրի պաշտպանության համար։ 44-օրյա պատերազմից հետ շատերը գուցե որոշեցին թողնել ծառայությունը, հեռանալ, բայց ինքը որևէ վայրկյան չվարանեց, որ այս երկրին պետք է,  այս երկրի նվիրյալներից մեկն է»,- ասում է Ա. Ղուկասյանը։

Ընտանիքում երեք եղբայր են։ Նարեկը միջնեկն էր, ամուսնացած չէր։

«Բավականին երկար ժամանակ է ծառայում Հայոց բանակում, սակայն, լինելով հատուկ ջոկատային, շատ բան չէր պատմում իր մասին, անձայն իր գործն էր անում»,- ասում է Ա․ Ղուկասյանը։

Սևան քաղաքը Արցախյան երրորդ պատերազմում երեք տասնյակից ավելի զոհ է ունեցել։

«Կամաց-կամաց փորձում էինք թոթափել այդ վիշտը ու նորից նոր կորուստ։ 

Սևան համայնքը սգում է։ Մեզ համար մեծ կորուստ է Նարեկի զոհվելը»,- ասում է Ա․ Ղուկասյանը, ով անձամբ է ճանաչել Նարեկ Սարգսյանին։

Հիշեցնենք, որ ապրիլի 11-ին՝ ժամը 16:00-ի սահմաններում, Ադրբեջանի ԶՈՒ ստորաբաժանումները  կրակ են բացել Տեղ համայնքի ուղղությամբ ինժեներական աշխատանքներ իրականացնող  ՀՀ ԶՈՒ զինծառայողների ուղղությամբ: Հայկական կողմը դիմել է պատասխան գործողությունների: Ժամը 17:30-ի սահմաններում նույն ուղղությամբ Ադրբեջանի ԶՈՒ ստորաբաժանումները կիրառել են ականանետային  միջոցներ: ԶՈՒ ստորաբաժանումները ձեռնարկել են անհրաժեշտ պաշտպանական միջոցներ: Ադրբեջանական հարձակման հետևանքով, հայկական կողմն ունի 4 զոհ և 6 վիրավոր:

ՀՀ ինքնիշխան տարածքը անձնվիրաբար պաշտպանելիս զոհված զինծառայողներն են.

Արթուր Ավետիսի Սահակյան (ծնվ. 1999թ.)
Մկրտիչ Արմենի Հարությունյան (ծնվ. 1989թ.)
Հենրիկ Վաչագանի Քոչարյան (ծնվ. 1997թ.)
Նարեկ Գագիկի Սարգսյան (ծնվ. 1994թ.)