Ձեր վստահելի աղբյուրը

«44-օրյա պատերազմից հետո նոր ձևավորված բնագծերում բազմաթիվ դեպքեր են գրանցվում ադրբեջանցիների զինծառայողների կողմից քաշքշուկների, դրանցով պայմանավորված տարբեր միջադեպերի, իսկ վերջին՝ երեկվա ողբերգական միջադեպի հետևանքով հայկական կողմը 4 զոհ է ունեցել»,-խորհրդարանում հայտարարեց «Պատիվ ունեմ» խմբակցության պատգամավոր Տիգրան Աբրահամյանը:

Վերջինս հարց ուղղեց պաշտպանության փոխնախարար Արման Սարգսյանին՝ ասելով. «Բանակցություն ասվածը, որը տեղի է ունենում հայ և ադրբեջնացի զինծառայողների միջև, պայմանական ասած՝ սահմանային ճշգրտումների համատեքստում, ինչպե՞ս է կանոնակարգվում, ի՞նչ հրամանների և որոշումների հիման վրա: Ո՞վ է լիազորություն տալիս որևէ մեկին, որևէ հատվածում, հրամանատարական կազմից բանակցելու ադրբեջանցիների հետ և ըստ այդմ տարբեր իրավիճակներում դեպի հայկական դիրքեր եկող ադրբեջանցիների ուղղությամբ պայմանականորեն կրակ չբացելու կամ չզգուշացնելու համար»:

Փոխնախարար Արման Սարգսյանը հայտնեց, որ եթե տեղում տեղի են ունենում բանակցություններ, որպես կանոն, այն իրականացվում է հրամանատարների միջոցով՝ ներքին պայմանավորվածությունների հիման վրա:

«Որևէ ձևով հնարավոր չէ կանոնակարգել, թե որ պահին կարող է բանակցելու անհրաժեշտություն առաջանալ, քանի որ «բանակցություն» ասվածը լայն հասկացություն է և փոքր հարցի շուրջ պայմանավորվածություն ձեռք բերելը բանակցությունների ձև է»-հայտնեց փոխնախարարը և հավելեց, որ նման իրավիճակներում այդտեղ սպաներ են լինում, որոնք օպերատիվ լուծումներ են գտնում՝ ճշտելով հրամանատարների հետ:

Փոխնախարարի խոսքով՝ հայ-ադրբեջանական սահմանի հարցը համապարփակ լուծում  կստանա կողմերի ձևավորած հանձնաժողովների միջոցով, իսկ տեղում բերված քարտեզների և տեղային այլ հարցերը՝ հնարավոր միջոցներով:

«Եթե մի կողմից կա սահմանազատման-սահմանագծման հանձնաժողով և դրա հիմքում դրված սկզբունքներ, թե ինչպես այն պետք է արվի, ապա լրիվ անհասկանալի է տեղում զինվորականների և հրամանատարների կողմից նախաձեռնություն վերցնելը և վարելը»,-հայտարարեց  Տիգրան Աբրահամյանը և հավելեց. «Տեղում է հակասություն է առաջանաում, քանի որ երբ հայկական դիրքերի ուղղությամբ ադրբեջանական զինծառայողներ են գալիս, ապա կանոնագիրքը լրիվ այլ բան է սահմանում: Փաստացի, բանակցությունների կանոնակարգված չլինելու և ադրբեջանական սադրանքի հետևանքով 4 զինծառայողի զոհվելու դեպք է արձանագրվել»:

Արման Սարգսյանը հակադարձեց, որ բանակցություններ կամ դրանց բացակայության պատճառով տեղի չի ունեցել միջադեպը, այլ ադրբեջանցիների կողմից արձանագրվել է սադրանք, որն ակնհայտ երևում է նաև ՊՆ-ի տարածած տեսագրությունից, երբ տրանսպորտային միջոցով մոտենում են, սադրում և կրակ բացում: