Ձեր վստահելի աղբյուրը

Առողջապահության նախարարությունը, որ ամենօրյա ռեժիմով հայտարարում էր կարմրուկի գրանցված դեպքերի, հոսպիտալացվածների, դուրս գրվածների թվի, պատվաստվելու անհրաժեշտության մասին, հանկարծ լռեց։

Գերատեսչությունը վերջին անգամ  հիվանադացության մասին տվյալներ հրապարակել է մարտի 29-ին՝ երկու շաբաթ առաջ, ըստ որի կարմրուկի հիվանդացության 85 դեպք է գրանցվել, որից 7-ը հսոպիտալացված է։ Դեպքերից 57-ը երեխաներ են, 28-ը` մեծահասակներ:

Ինչպե՞ս է փոխվել կարմրուկի հիվանդացության վերաբերյալ վիճակագրությունը մարտի 29-ից ի վեր, քանի՞ նոր դեպք է գրանցվել, առավել շատ դեպքեր ո՞ր բնավայարերում են գրանցվում։ Այս ու այլ հարցեր Panorama.am-ն ուղղեց ԱՆ-ին։

«Այս պահին համաճարակը բավականին հանդարտ փուլում է, առանձնապես էական աճ չկա գրանցված։ Ցուցանիշները գրանցում ենք և համաճարակաբանական կորը տարվում է արդեն հաստատված լաբորատոր դեպքերով՝ ըստ դիմելիության»,-ասաց Առողջապահության նախարարի մամուլի քարտուղար Հռիփսիմե Խաչատրյանը՝ խուսափելով կարմրուկի դեպքերի հստակ թվեր հրապարակելուց։

Նրա խոսքով, առաջիկա օրերին ԱՆ-ն թարմացված տվյալներ կհրապարակի։

ԱՆ հիվանդությունների վերահսկման և կանխարգելման ազգային կենտրոնից նույնպես Panorama.am-ին նման վիճակագրություն չտրամադրեցին՝ նշելով, որ թարմացված տվյալները կհրապարակի ԱՆ-ն։

Հիշեցնենք՝ կարմրուկը սուր վիրուսային, խիստ բարձր վարակելիությամբ հիվանդություն է, որը բնորոշվում է ցանային երևույթներով, չոր հազով, ջերմությամբ և այլն: Վարակը փոխանցվում է օդային ճանապարհով։