Ձեր վստահելի աղբյուրը

«Որդիների Կանչ» սոցիալ-հայրենասիրական ՀԿ անդամները նախնական 24 ժամով հայտարարել են նստացույց։

«Հարգելի քաղաքացիներ, մտահոգ մարդիկ, մենք այս պահից սկսած Քննչական Կոմիտեում ենք և մեր նստացույցով պահանջում ենք անհապաղ պատասխանատվության ենթարկել այն 12 ոստիկաններին, որոնք փաստացի մարմնական վնասվածքներ են հասցրել մեր մայրերին, որոնք ի տարբերություն ոստիկանների մայրերի՝ ՀԵՐՈՍ ԾՆԱԾ ՄԱՅՐԵՐ ԵՆ❗️

Հենց հիմա❗️ 24 Ժամով նստացույց, իսկ հետագա անելիքների մասին լրացուցիչ կտեղեկացնենք»,- նշված է «Որդիների Կանչ»-ի ֆեյսբուքյան էջում։ 

Հիշեցնենք, որ «Որդիների Կանչ» ՀԿ անդամները 44--օրյա պատերազմում զոհված զինծառայողների ծնողներն են, հարազատները։ 

Նախորդ տարվա սեպտեմբերի 21-ին Եռաբլուր զինվորական պանթեոնում Արցախյան երրորդ պատերազմում զոհված զինծառայողների ծնողների նկատմամբ ոստիկանության ծառայողները  բռնություն էին գործադրել։ Այս դեպքով ոստիկանների ու ծնողների միջև առերեսումներ են եղել։ 

«Մենք կարծում ենք՝ արդեն անիմաստ է առերեսումը, սա արհեստական ձգձգվող պրոցես է դառնում։ Իրենք ներկայացրել են, որ բոլոր ծնողները պետք է առերեսվեն բոլոր ոստիկանների հետ։ Դա ամիսներ կտևի։ Երբ գոնե մեկ ոստիկանի մեղադրանք  առաջադրվի, քանի որ հենց իրենք են ասում, Արթուր Խուդինյանի խոսքում նման բան կար, որ  անօրինական գործողություն է տեղի ունեցել, մենք տեսնենք, որ գործը տեղից շարժվում է,  կմտածենք՝  առերեսումները շարունակվե՞ն, թե՞ ոչ։ Այսօր, կարծում ենք, ամեն ինչը արհեստական է»,- ավելի վաղ ասել էր զոհված  զինծառայողներից մեկի հայրը։ 

Լուսանկարները՝ 2022 թ., սեպտեմբերի 21, Եռաբլուր զինվորական պանթեոն