Ձեր վստահելի աղբյուրը

«Մի քիչ անհասկանալի է, որ Մարիա Զախարովան Հայաստանից պարզաբանումներ է պահանջում, Հայաստանն առաջ է շարժվում Հայաստանի պետական շահերով և ամեն ինչ անում է իր Զինված ուժերի մարտունակությունը բարձրացնելու ուղղությամբ և այդպես էլ շարունակվելու է»,- խորհրդարանական ճեպազրույցների ժամանակ ասաց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ արձագանքելով ՌԴ ԱԳՆ ներկայացուցիչ Զախարովայի հայտարարությանը, որ պարզաբանումներ է խնդրել Երևանից՝ ՆԱՏՕ-ի զորավարժություններին ՀՀ-ի մասնակցության վերաբերյալ։

ՔՊ-ական պատգամավորը նշեց, որ ՀՀ-ն իր ռազմավարական գործընկերոջ՝ Ռուսաստանի հետ շարունակում է ջերմ, բարեկամական, ռազմավարական հարաբերությունները, իր ջերմ հարաբերությունները շարունակում է նաև այլ երկրների գործընկերների հետ և ամեն ինչ անում է ի նպաստ ՀՀ զինված ուժերի զարգացման և մարտունակության բարձրացման։

Ճեպազրույցին ներկա ՔՊ-ական Անդրանիկ Քոչարյանն էլ արձագանքելով Զախարովայի մեկ այլ հայտարարությանն՝ ասաց. «Տիկին Զախարովան ասել է, թե Ռուսաստանի անմիջական մասնակցությամբ գործողությունները Տեղ գյուղում դադար են ստացել։ Կասկածի տակ չեմ դնում տիկին Զախարովայի ասածը, որ ինչ-որ ձևաչափով մասնակցել են, բայց կռվել է Հայաստանի Զինված ուժերը։  Եթե մենք չկռվեինք, զոհեր չտայինք, ինչքան ուզում է ՌԴ արտաքին գերատեսչությունն աջուձախ զանգեր աներ, դա խնդրի լուծմանը չէր տանելու։ Խնդիրը լուծվել է բացառապես, առաջին հերթին մեր զինվորականության քաջարի գործողությունների արդյունքում»։