Ձեր վստահելի աղբյուրը

Կապանի բնակիչների կողմից երեկ հայտնաբերված ու բռնված ադրբեջանցին գտնվում է ԱԱԾ-ում։ Ինչո՞ւ ծառայությունն ադրբեջանցուն չի հանձնում քննչական կոմիտեին, որի վարույթում է գտնվում ԶՊՄԿ-ի աշխատակցի սպանության գործը։ Հիշեցնենք, որ Սյունիքում համոզված են՝ հենց ադրբեջանցին է սպանել կոմբինատի աշխատակցին։

«Անձը չի ներկայացվել ՔԿ՝ որպես վարույթ իրականացնող մարմնի։ Այդ հանգամանքի հետ կապված ես որևէ ուրիշ տեղեկատվություն տրամադրել չեմ կարող, քանի որ չունեմ նման տեղեկություններ»,-Panorama.am-ին ասաց ՔԿ խոսնակ Գոռ Աբրահամյանը։

Այն տեղեկությունները, որ սպանված տղամարդու հեռախոսը գտել են ադրբեջանցու մոտ, համապատասխանո՞ւմ են իրականությանը, հարցրեցինք ՔԿ-ին։

«Դրա վերաբերյալ տեղեկություններ չունենք, բայց մամուլի հրապարակումները քրեական վարույթի շրջանակում ստուգվում են»,-ասաց նա։

ՔԿ-ն ավելի վաղ հայտնել էր, որ ապրիլի 12-ին՝ ժամը 18:10-ին, «Կապանի բժշկական կենտրոն» ՓԲԸ-ից և ոստիկանության Կապանի բաժնից ահազանգ և հաղորդում է ստացվել այն մասին, որ   Կապան համայնքի հիշյալ պահակակետում մահացած տղամարդու մարմին կա, որի վրա առկա են հրազենային վնասվածքներ:

Դեպքի վայրի զննությամբ ՓԲ ընկերության պահպանության 2-րդ խմբի հենակետում՝ շարժական տնակի դիմաց, հայտնաբերվել է 56-ամյա տղամարդու դին՝ կրծքավանդակի առաջնային և հետին պատերին առկա միջանցիկ և գլխի աջակողմյան քունքային շրջանի կույր հրազենային վիրավորումներով:

Դեպքին հաջորդող օրը Կապանում հայտնաբերել են ադրբեջանցուն։ Ըստ նրա հեռախոսով արված տեսագրության, ադրբեջանցին ասել է, որ հայի արյուն է թափել։

Երեկ հայտնաբերված երկրորդ ադրբեջանցու մոտից գտել են սպանված կապանցու հեռախոսը, «Ազատության» հետ զրույցում ասել էր  Քաջարանի համայնքապետ Մանվել Փարամազյանը։