Ձեր վստահելի աղբյուրը

«Հետք»-ը գրում է.

«Դուբայը հայ օլիգարխների, քաղաքական գործիչների, պետական տարբեր պաշտոնյաների սիրելի վայրերից է։ Երբեմն նրանք իրենց զավակների հարսանիքներն են այնտեղ կազմակերպում, ծնուդներն են նշում, քաղաքական խորհրդակցություններ անցկացնում, գործարքների համար պայմանավորվածություններ ձեռք բերում, ծագած վեճերը հարթում: Նրանցից ոմանք ընտանիքներով այնտեղ Ամանորի տոներն են անցկացնում, նրանց կանայք` մեկնում առևտրի:

«Հետքի» ձեռքի տակ հայտնված նոր տվյալները ցույց են տալիս որոշ հայ պաշտոնյաների ու գործարարների՝ Դուբայում ունեցած անշարժ գույքի ծավալներն ու շքեղությունը: Այս անձանցից ոմանք Հայաստանում անցնում են տարբեր քրեական գործերով:

2018-ին «Հետքը» գրել էր Դուբայում գույք գնած մի քանի հայ գործարարների ու պաշտոնյաների մասին: Տվյալները ստացել էինք Կազմակերպված հանցավորության և կոռուպցիայի լուսաբանման նախագծի (OCCRP, այս ցանցի անդամ է նաև «Հետքը») մեր գործընկերներից:

Այս անգամ ևս տվյալները ձեռք ենք բերել OCCRP-ից, որն իր հերթին, ինչպես նախորդ անգամ, դրանք ստացել է Վաշինգտոնում գործող C4ADS շահույթ չհետապնդող կազմակերպությունից, որն ուսումնասիրում է միջազգային հանցավորությունն ու կոնֆլիկտները:

Դուբայում գույք ունեցող հայերի թիվը բավականին մեծ է, բայց նրանցից ոչ բոլորն են հանրությանը հայտնի: Այս անգամ ընտրել ենք նախկին 4 բարձրաստիճան պաշտոնյայի, որոնք չեն հայտարարագրել Դուբայում իրենց ունեցվածքը, չնայած օրենքով նման պարտավորություն ունեին: 

Գագիկ Բեգլարյանը բնակարան է գնել Դուբայի հայտնի արմավենու վրա

Գագիկ Բեգլարյանի քաղաքական կարիերան ծաղկում էր 1990-ականների սկզբից մինչև 2016 թ.: 1993-1995 թթ. և 2012-ին մի կարճ ժամանակահատված նա ՀՀ խորհրդարանի պատգամավոր էր, 2002-2009 թթ. Երևանի Կենտրոն թաղային համայնքի ղեկավարն էր, 2009-2010 թթ.՝ Երևանի քաղաքապետը, 2012-2016 թթ. էլ զբաղեցնում էր տրանսպորտի և կապի նախարարի պաշտոնը: Հիմա, սակայն, Հայաստանում Բեգլարյանի գործերը, մեղմ ասած, լավ չեն: ՀՀ իրավապահները երկու խոշոր գործ են նախաձեռնել նրա վերաբերյալ: 

Բեգլարյանը չի հայտարարագրել Դուբայի իր բնակարանը, Դատախազությունն էլ այն չի ներառել բռնագանձվող գույքի մեջ

Ինչպես տեսնում ենք, Դատախազության ներկայացրած բռնագանձման ենթակա անշարժ գույքը գտնվում է միայն Հայաստանում, սակայն «Հետքը» պարզել է, որ Գագիկ Բեգլարյանը գույք ունի նաև Դուբայում:

Մեր ձեռքի տակ եղած տվյալների համաձայն՝ նա այդ գույքը ձեռք է բերել 2008 թ.-ից մինչև 2018 թ. ընկած ժամանակահատվածում: Թե կոնկրետ երբ, դժվար է ասել: Նախկին պաշտոնյայի գույքը գտնվում է արմավենու տեսքով հայտնի «Palm Jumeirah» արհեստական կղզու ամենավերին մասում՝ «Balqis Residence» համալիրում: Բեգլարյանի բնակարանն այս համալիրի 7-րդ հարկում է, ընդհանուր մակերեսը 243 քմ է, ունի 3 ննջասենյակ, պատշգամբ (42 քմ): 

Գագիկ Բեգլարյանի նախկին պաշտոնյա եղբայրը ևս տուն է գնել արմավենու վրա 

Գագիկ Բեգլարյանի կրտսեր եղբայրը՝ Հակոբ Բեգլարյանը, ևս բնակարան է ձեռք բերել Դուբայում: Գույքը նա գնել է 2007-2017 թթ.  միջակայքում: Հ. Բեգլարյանը պետական պաշտոնյա էր 2005-2012 թթ., երբ զբաղեցնում էր «Պետական գնումների գործակալություն» ՊՈԱԿ-ի, այնուհետ՝ «Գնումների աջակցման կենտրոն» ՊՈԱԿ-ի պետի պաշտոնը: 2014-2017 թթ. կրտսեր Բեգլարյանը ՀՀ քաղաքաշինության նախարարի, ապա՝ քաղաքաշինության պետական կոմիտեի նախագահի տեղակալն էր, իսկ 2017-2019 թթ.՝ ԱԺ պատգամավոր:

Նա անշարժ գույք է գնել «Palm Jumeirah»-ի «ցողունի» վրա գտնվող «Fairmont Palm Residence» համալիրի հյուսիսային մասնաշենքում՝ «The Residences North»-ում: Բեգլարյանի տունը 8-րդ հարկում գտնվող բնակարան է, որի մակերեսը 160 քմ է, ունի 2 ննջասենյակ, պատշգամբ (18 քմ): Նախկին պաշտոնյան նաև մեքենայի կայանատեղ ունի այստեղ: Դուբայի կադաստրի գնահատմամբ՝ «Palm Jumeirah»-ում գտնվող և 2 ննջասենյակ ունեցող բնակարանի վարձակալության տարեկան վճարը կարող է լինել 134.000-164.000 արաբական դիրհամ (36-45 հազ. դոլար), որը չի ներառում կոմունալ ծառայությունների վճարները: Այդուհանդերձ, ներկա պահին Հ. Բեգլարյանի բնակարանը վարձակալ չունի: Շեշտենք, որ մինչ օրս հենց Հակոբ Բեգլարյանն է տան սեփականատերը: 

Նախկին պատգամավորը 2 բնակարան ունի Դուբայում

Հրանտ Դավթյանն այն հայերից է, որոնք Դուբայում համեմատաբար շուտ են գույք ձեռք բերել: Հիշեցնենք, որ նա ԱԺ պատգամավոր է եղել 2012-2017 և 2018-2019 թթ.: Դավթյանի արաբական ունեցվածքի մասին գրել էինք 2018-ի աշնանը: Սակայն անդրադարձել էինք այն ժամանակ դեռևս պաշտոնավարող Դավթյանի միայն մեկ բնակարանին, քանի որ մյուսի մասին տեղեկություններ չունեինք:

Բնակարաններից մեկը Դավթյանը հայտարարագրել էր «Հետքի» հարցերից հետո։

Դուբայում գույք է ձեռք բերել նաև Հրանտ Դավթյանի եղբայրը

Հրանտ Դավթյանի եղբայրը՝ Հովհաննես Դավթյանը, Դուբայում բնակարան է գնել 2009-2013 թթ. ընթացքում (Դավթյանները հաշվառված են Էջմիածնի նույն հասցեում): Գույքը գտնվում է «Jumeirah Village Circle» շրջանի «Seasons Community» բնակելի թաղամասում: Թաղամասն ունի 2 կլաստեր՝ «Ամառ» («Seasons Community Summer») և «Աշուն» («Seasons Community Autumn»): Հովհ. Դավթյանի տունը «Ամառ» կլաստերում է: 3-րդ հարկում գտնվող գույքի մակերեսը 56 քմ է, ունի 1 ննջասենյակ, պատշգամբ (9 քմ), Դավթյանը նաև ավտոկայանատեղի սեփականատեր է: 

Սամվել Ալեքսանյանն ու Շողերինա Մկրտչյանը Հրանտ Դավթյանի հարևաններն են

Մեծահարուստ գործարար Սամվել Ալեքսանյանը ԱԺ պատգամավոր էր 2003-2019 թթ.: Նա և կինը՝ Շողերինա Մկրտչյանը, վերը հիշատակված «Trident Grand Residence»-ում բնակարան են ձեռք բերել 2012-2014 թթ. միջակայքում: Ամուսինները Հրանտ Դավթյանի անմիջական հարևաններն են:

Ալեքսանյանի ու Մկրտչյանի տան մակերեսը 202 քմ է, ունի 3 ննջասենյակ, պատշգամբ (34 քմ), ամուսինները նաև 2 հատ ավտոկայանատեղ ունեն: Բնակարանը հանձնված է վարձակալության: Ըստ Դուբայի կադաստրի՝ Դուբայ Մարինա շրջանում 3 ննջասենյակ ունեցող բնակարանի վարձակալության տարեկան վճարը կարող է լինել 147.000-179.000 արաբական դիրհամ (40-49 հազ. դոլար): Ինչ վերաբերում է վաճառքի գներին, ապա «Trident Grand Residence»-ում այսօր կարելի է 3 ննջասենյակ և շուրջ 200 քմ մակերես ունեցող բնակարան գնել 4,2 մլն արաբական դիրհամից սկսած (1,1 մլն դոլար):

Կոռուպցիայի կանխարգելման հանձնաժողովից տեղեկացել ենք, որ ո՛չ Ս. Ալեքսանյանը, ո՛չ նրա կինը երբևէ չեն հայտարարագրել Դուբայում գտնվող անշարժ գույք: Սա, ըստ էության, իրավական խնդիրներ կառաջացնի նրանց համար, քանի որ առնվազն 2014 թ. նրանք արդեն այդ բնակարանի տերերն էին, սակայն այդպես էլ չեն հայտարարագրել գույքը մինչև 2019 թ. հունվար, երբ Ալեքսանյանը վայր է դրել մանդատը։

Դատախազությունը չի ասում, թե արդյոք ուսումնասիրում է Ալեքսանյանի, Բեգլարյանի ու Դավթյանի ունեցվածքը

«Հետքը» ՀՀ գլխավոր դատախազությունից հետաքրքրվել էր, թե արդյոք ուսումնասիրում է Սամվել Ալեքսանյանի, Հակոբ Բեգլարյանի, Հրանտ Դավթյանի ունեցվածքը ապօրինի գույքի բռնագանձման վարույթի շրջանակներում: Խնդրել էինք հնարավորության դեպքում տրամադրել բռնագանձման ենթակա գույքի ցանկը կամ թեկուզ հայտնել, թե արդյոք այդ ցանկում առկա է Դուբայ քաղաքում գտնվող գույք:

Դատախազությունից փոխանցել են, որ «Ապօրինի ծագում ունեցող գույքի բռնագանձման մասին» օրենքի համաձայն՝ անձին պատկանող գույքի առնչությամբ ուսումնասիրության առկայության կամ բացակայության փաստը գաղտնի է, հետևաբար՝ տեղեկատվություն չի կարող տրամադրվե»։

Մանրամասները՝ սկզբնաղբյուր կայքում։