Ձեր վստահելի աղբյուրը

Երկու օր է ֆեյսբուքյան օգտատերերը տարածում են իշխող «Քաղաքացիական պայմանագիր» խմբակցության պատգամավոր Հովիկ Աղազարյանի հետ նամակագրությունից հատվածներ, որոնցում պատգամավորի կողմից հայհոյանքներ են հնչեցնում իրեն գրող օգտատերերի ու նրանց հարազատների հասցեին։

Hraparak.am-ի հետ զրույցում երեկ Հ.Աղազարյանը ասել էր. «Հանգստյան օրերին իմ էջ չեմ մտել, ուսանողական ընկերներով Քանաքեռավանում հավաքույթ էինք կազմակերպել, չեմ հերքում՝ գրառումն իմն է, բայց մեսենջերից չեմ օգտվել։ Հավանաբար ինչ-որ մեկը զուգահեռ օգտագործել է մեսենջերս, գուցե էջս կոտրել են, խնդրել եմ օգնականս պարոլը փոխի»։

Panorama.am-ը մի քանի հարցով դիմեց ՔՊ-ական պատգամավոր Հովիկ  Աղազարյանին։

Panorama.am-Պարոն Աղազարյան, երեկ ասել էիք, որ ձեր մեսինջերի էջը հնարավոր է կոտրել են։ Դիմե՞լ եք այդ հարցով իրավապահներին։

Հովիկ  Աղազարյան-Ի՞նչ է նշանակում հնարավոր է կոտրել  են։

Panorama.am-Դուք եք ասել՝ «գուցե էջս կոտրել են»։

Հովիկ  Աղազարյան-Մյուս տարբերակը ո՞րն է, եթե չեն կոտրել։ 

Panorama.am-Ես ձեզ հարցնում եմ՝ կոտրել են, դիմե՞լ եք իրավապահներին։

Հովիկ  Աղազարյան-Չէ, դուք ձեր հարցը կոռեկտ ձևակերպեք։

Panorama.am-Ես ձեր խոսքն եմ մեջբերել՝ «գուցե էջս կոտրել են»։ Եթե կոտրել են, դիմե՞լ եք իրավապահներին։ 

Հովիկ  Աղազարյան-Գուցե էջս կոտրել են, հակառակը ո՞րն, որ չե՞ն կոտրել։ 

Panorama.am- Հիմա հարցնում եմ՝ դիմե՞լ եք իրավապահներին ձեր էջը կոտրելու հարցով։

Հովիկ  Աղազարյան-Չէ։

Panorama.am-Իսկ ինչո՞ւ։

Հովիկ  Աղազարյան-Բայց ինչո՞ւ պետք է դիմեմ, որ։

Panorama.am-Որպեսզի վերականգնեն, նմանատիպ դեպքեր չկրկնվեն։

Հովիկ  Աղազարյան-Մենք վերականգնել ենք, արդեն պարոլը փոխել ենք, պաշտոնական բաներ ենք դրել։

Panorama.am-Պարզվեց՝ ո՞վ է կոտրել։

Հովիկ  Աղազարյան-Չէ։

Panorama.am-Իրավապահներին չեք դիմելու։ Այսինքն, ձեզ հետաքրքիր չէ ո՞վ է կոտրել։

Հովիկ  Աղազարյան-Չէ, ես ժամանակ չունեմ դրա վրա ծախսեմ։ Առանց այդ էլ իրավապահներն այնքան ծանրաբեռնված են, մի հատ էլ պարզեն, թե ով է նման հիմարություններ դուրս տվել։