Ձեր վստահելի աղբյուրը

«Նախ՝ 2022 թվականի 12,6 % տնտեսական աճի շուրջ 3/4-րդ մասն արձանագրվել է ի հաշիվ այն ոլորտների, որոնք կրել են ռուս-ուկրաինական պատերազմով պայմանավորված տնտեսական դրական ազդեցությունները, դրանք են ծառայությունների, ներքին և արտաքին առևտրի, բնակարանաշինության և ֆինանսական ոլորտները»,-ԱԺ-ում կառավարության գործունեության ծրագրի 2022թ կատարողականի քննարկման ժամանակ ունեցած ելույթում տեղեկացրեց «Հայաստան» խմբակցության պատգամավոր Թադևոս Ավետիսյանը։

Նա հայտարարեց, որ աննախադեպ աճում է նաև շահումով խաղերի ոլորտը, որը խորացող սոցիալական խնդիրների հետևանք է։

Պատգամավորի տեղեկացմամբ՝ 2022 թվականին միայն բանկային համակարգի միջոցով ֆիզիկական անձանց դրամական փոխանցումները Ռուսաստանից Հայաստան կազմել են մոտ 3,6 միլիարդ ԱՄՆ դոլար՝ նախորդ տարվանից 4 անգամ ավել, իսկ դրամական փոխանցումների դրական մնացորդը, որը մնացել է տնտեսության մեջ, կազմել է շուրջ 2,6 միլիարդ դրամ կամ ՀՆԱ-ի շուրջ 15 %-ը։

«Ռուսաստանի հետ առևտրաշրջանառությունն աճել է շուրջ 80 %-ով, որը հիմնականում կրել է վերաարտահանման բնույթ։ Այսինքն՝ հիմնականում արտահանել ենք այլ երկրներից ներմուծվածը, ոչ թե՝ մեր արտադրանքը»,-ասաց պատգամավորը և արձանագրեց, որ արդյունաբերության ոլորտի աճը շուրջ 2 անգամ զիջել է տնտեսական միջին աճին, իսկ գյուղատնտեսությունը 2021 թվականի կրճատումից հետո արձանագրել է զրոյական աճ։

Հայտարարելով, որ 2018-2021 թվականներին ներդրումների իրական աճը տարեկան միջինը կազմել է ընդամենը 3,5 %՝ ընդդիմադիր պատգամավորը հայտնեց, որ 2022 թվականին՝ նախորդ տարվա համեմատ տնտեսության իրական հատվածում օտարերկրյա ընդհանուր ներդրումների զուտ հոսքը կրճատվել է 6 %-ով՝ մոտ 32 միլիոն ԱՄՆ դոլարով։

«2022 թվականին հիմնական միջոցների համախառն կուտակումը (սա առավելապես է արտահայտում համախառն ներդրումների ցուցանիշը)՝ նախորդ տարվա համեմատ աճել է 16,6 %ով կամ շուրջ 540 միլիոն ԱՄՆ դոլարով։ 2026 թվականին խոստացված՝ ներդրում/ՀՆԱ  25 % հարաբերակցությունն ապահովելու համար անհրաժեշտ կլինի համախառն ներդրումներն ավելացնել տարեկան շուրջ 25 %+ով, ինչն անիրատեսական է»,-հայտնեց Ավետիսյանը և փաստեց, որ 2023 թվականին էապես նվազել է տնտեսական ակտիվության աճը՝ 2022 թվականի 14,2 %-ից իջել է 10,9 %, իսկ արդյունաբերության ու գյուղատնտեսության աճերը կրկին զրոյական են։

Նշելով, որ պետական պարտքը աճում է՝ պատգամավորն ասաց, որ 2018-2021 թվականներին խոստացված թռիչքաձև աճի փոխարեն ՀՆԱ-ի աճի տարեկան միջին տեմպը կազմել է ընդամենը 2,8 %, իսկ պետական պարտքի տարեկան միջին աճը՝ 10 %-ից ավել։