Ձեր վստահելի աղբյուրը

«Մենք մեր զորակցությունն ենք հայտնում Արցախի խորհրդարանի օրերս հայտնած դիրքորոշմանը և գտնում ենք, որ Հայաստանի իշանությունների տեսակետը Ղարաբաղյան հակամարտության թեմայով լեգիտիմ չէ և չի արտահայտում մեր ժողովրդի ճնշող մեծամասնության տեսակետը»,-ԱԺ-ում հայտարարեց «Հայաստան» խմբակցության պատգամավոր Անդրանիկ Թևանյանը։

Նրա խոսով՝ Հայաստանի իշխանությունը Արցախը համարում է ադրբեջանական և հարցականի տակ դնում Հայաստանի գոյությունը։

Պատգամավորը հայտարարեց, որ 2018 թվականինր մարդկանց սպասումները չիրականացան, նրանք խաբվեցին։

«2018-ին իշխանության եկածները հայտարարեցին, որ մենք արդեն իսկ ապրում ենք ազատ և երջանիկ Հայաստանում։ Խոստացվում էր, որ լինելու է սիրո և համերաշխության մթնոլորտ: Իրական կյանքում ստացանք ճիշտ հակառակը»,-հայտարարեց Թևանյանը և հավելեց. «Ո՞րն է ՀՀ քաղաքացու երջանկության բանալին: Պատասխանը շատ պարզ է՝ Հայաստանը պետք է լինի անվտանգ, քաղաքացու կյանքի իրավունքը պետք է լինի պաշտպանված, նա պետք է ապրի բարեկեցիկ կյանքով և ապահովվեն նրա ազատությունները: Այս բոլոր ուղղություններով ունենք ողբերգական արդյունքներ և չդադարող կորուստներ»:

Ասելով, որ իշխանություններն ասում են, որ եթե անվտանգության հարցը հանեն, ապա մնացած առումներով ամեն ինչ փայլուն է՝ Անդրանիկ Թևանյանը նկատեց, որ այն նույնն է, թե մարդը մահանում է, բայց նրա բոլոր օրգանները լավ վիճակում են:

Պատգամավորի խոսքով՝ իշխանությունները խոստացել էին վերացնել ծայրահեղ աղքատությունն ու նվազեցնել աղքատների քանակը, բայց 2018-ին աղքատ էր մեր բնակչության 23,5 %ը, իսկ 2021-ին այն դարձել է 26,5 %, ծայրահեղ աղքատները 2018-ին բնակչության 1 %-ն էին, իսկ 2021-ին՝ 1,5 %։

«Այն նշանակում է, որ սոված է քնում հպարտ որակված շուրջ 45 հազար քաղաքացի։ 2022–ի աղքատության տվյալները չկան, բայց դժվար չէ կռահել, որ վիճակը վատացել է, քանզի բարձր գնաճ է եղել ու չի եղել համարժեք վճարունակ պահանջարկ»,-ասաց նա։

Թևանյանը հիշեցրեց, որ ընդդիմություն աշխատելու տարիներին այսօրվա իշխանությունները հայտարարում էին, որ գազի, հոսանքի, ջրի, այլ ապրանքների գները բարձր են ու ժողովուրդը թալանվում է, քանզի կան մենաշնորհներ և օլիգարխիա՝ հավելելով. «Դատելով այժմյան անվերջ թանկացումներից՝ հիմա իրենք են օգտվում այդ ամենից՝ վերածվելով «հեղափոխական» օլիգարխների՝ նորաթուխ զիմզիմովների: «Կոռուպցիան վերացել է» գոռացողների իշխանության օրոք 2022-ին կոռուպցիան 2021-ի համեմատ ավելացել է։ «Transparency International»-ի զեկույցում Հայաստանը գրանցել է հետընթաց՝ 180 երկրների շարքում զբաղեցնելով 63-րդ տեղը և 2021-ի զեկույցի համեմատ դիրքերը զիջելով 5 հորիզոնականով»:

Ընդդիմադիր պատգամավորը հայտարարեց, որ  ԱԺ ամբիոնից հնչել են հակապետական, հակասահմանադրական հայտարարություններ։

«Նիկոլ Փաշինյանը գրեթե նույնությամբ կրկնում էր տխրահռչակ Ջոն Բոլթոնի խոսքերը՝ պատմական կարծրատիպերից հրաժարվելու, հակառուսական և հակաիրանական գործիք դառնալու թեմայով։ Դրանք ինքնախոստովանական հայտարարություններ էին, որոնց շրջանակներում Ադրբեջանին առաջարկվում էր Արցախը՝ Հայաստանի անկախության ու 29,800-ի «կադաստրային թղթի» ճանաչման դիմաց»,-ասաց Թևանյանը։

Իր խոսքի ավարտին, հայտարարելով, որ հեղափոխությունը դեռ առջևում է, որը հնարավոր է  հանրային լայն կոնսոլիդացիայի միջոցով, պատգամավորն ասաց, որ դրա մե մեջ տեսնում է նաև «Քաղաքացիական պայմանագրի» այն շարքային անդամներին, որոնց նպատակը 2018-ին Արցախն Ադրբեջանին հանձնելը չէր, Հայաստանի կործանումը չէր և երկրում առկա արատավոր երևույթները խորացնելը չէր։

«Մեզ պետք է իսկական հեղափոխություն, հեղափոխություն, որը կապահովի իրակա՛ն զարգացում, կբերի իրակա՛ն արդարություն, իրակա՛ն հաղթանակ, իրակա՛ն խաղաղություն։ Այսինքն կբերի այն, ինչին սպասում է մեր ժողովուրդը»,-հայտարարեց Անդրանիկ Թևանյանը։