Ձեր վստահելի աղբյուրը

«Իշխանությունների կողմից մշտապես գործի է դրվել սեփական սխալների ու ձախողումների համար մեղադրանքներից խուսափելու ամենափրկիչ միջոցը՝  տեղի-անտեղի համեմատվելով նախկինների հետ, սևացնել անցյալը, որ լուսավոր երևա ներկան»,-խորհրդարանում ունեցած իր ելույթում ասաց «Հայաստան» խմբակցության պատգամավոր Արմեն Ռուստամյանը։

Նրա խոսքով, եբ մարդն ուզում է արդարանալ ուրիշի գործած մեղքերը հիշատակելով, նմանվում է նրան, ով ուզում է մաքրվել ցեխաջրով լվացվելու միջոցով:
Հայտարարելով, որ անհնարին է անընդհատ խաբել մի ողջ ժողովրդի, որովհետև ամեն ինչ վաղ, թե ուշ բացահայտվելու է՝ Ռուստամյանն ասաց. «Բացահայտվելու է գործող իշխանությունների իրական ծրագիրը, որ նրանց խաղաղության գործընթացը մեզ տանելու է նոր  կապիտուլյացիայի: Այս իրողությունը փորձ է արվում խնամքով քողարկել և այն կդրսևորվի բոլորիս փաստի առաջ կանգնեցնելուց հետո միայն: գործընթացն էլ ձգձգվում է սոսկ այն պատճառով, որ դեռևս պարզ չէ, թե մենք որքան պետք է զիջենք, որ վերջնական լինի»:

Ընդդիմադիր պատգամավորի խոսով՝  հայ ժողովրդին ոչնչացնել ցանկացող թշնամին անդադար խոսում է պատերազմի լեզվով, իսկ իշանությունները ժողովրդին պատրաստում են խաղաղության:

«Ամեն օր մեզ թմրեցնում են՝ քարոզելով, թե խաղաղությունն է, որ բերելու է պաշտպանվածություն ու  անվտանգություն, այնինչ, հենց խաղաղությունը պաշտպանության կարիք ունի: Անվտանգությունից է բխում խաղաղությունը, իսկ  թշնամու բարեհաճությամբ ստացած կարծեցյալ անվտանգության երաշխավորը ոչ թե դու, այլ թշնամիդ է լինելու»,-ասաց  Ռուստամյանը և հավելեց. «Այս խաբկանքն ու կործանարար ընթացքը իշխանությունները  փորձում են ներկայանցել որպես միակ ճշմարիտն ու այլընտրանք չունեցողը: Դրա համար գործի է դրվել ողջ պետական մեքենան. Մի կողմից քարոզելու, որ ճար ու հնար չկա, քան զիջել այն, ինչ մեզնից պահանջվում է, մյուս կողմից անել ամեն ինչ կոտրելու մեր դիմադրության ոգին, սպառելու պայքարի հնարավորությունները և ժողովրդին պահել անճարության մեջ»:

Նա հայտարարեց, որ գործող իշխանության օրոք անկախության հռչակագրերը արհամարհված են, հաղթանակած բանակը պարտված է ու վարկաբեկված, եռամիասնությունը՝ խաթարված և պառակտված, եկեղեցին և համազգային կառույցները՝ հետապնդված ու հալածված և  թշնամու երազած լավագույն պայմանները ստեղծված են:

Ռուստամյանի խոսքով՝ վարչախումբն ուզում է հանրությանը համոզել, որ այս իրավիճակին այլընտրանք չկա, և եթե կա մեկը, որ ստեղծված իրավիճակում կարող է մի բան անել, դա հենց իրենք են:

«Իսկ այս իշխանության օրոք անելու մի բան է մնում, որի մասին օրնիբուն խոսում են այս իշխանությունները՝ ստորագրել մի նոր կապիտուլյացի և այն հանրությանը մատուցել որպես խաղաղության պայմանագիր: Ակնհայտ է, որ այդպիսի խաղաղության պայմանագրով Արցախը շատ արագ կհայաթափվի և կվերածվի Նախիջևանի, բայց առանց կարգավիճակի»,-հայտարարեց պատգամավորը և որպես ելք նշելով,  որ չպետք է ստորագրել կապիտուլյացիոն որևէ փաստաթուղթ, որը կվտանգի Հայաստանի ու Արցախի լինելությանը, հավելեց.  «Իսկ եթե իշխանությունները հակաճառեն, որ մենք չստորագրելու տարբերակ չունենք, ապա դա ոչ այլ ինչ է, եթե ոչ խոստովանություն, որ գործ ունենք հենց կապիտուլյացիա կոչվող փաստի հետ: Պետք է արմատապես փոխել երկրի կառավարման ներքին ու արտաքին քաղաքականության ուղենիշները»: