Ձեր վստահելի աղբյուրը

«2021 թվականին հաստատվել է  հանրակրթության պետական չափորոշիչը, որով սահմանված են մեր մոտեցումները։ Չափորոշիչը ներդրվելու է  բոլոր դպրոցներում այս տարվա սեպտեմբերից, սա է իրավիճակն և այս իրավիճակը չի փոխվում»,- Ազգային ժողովում լրագրողների հետ զրույցում ասաց ԿԳՄՍ նախարար Ժաննա Անդրեասյանը՝ պատասխանելով հարցին, որ Ամենայն Հայոց Կաթողիկոս Գարեգին Երկրորդը նախօրեին ասել է, որ «Հայ եկեղեցու պատմություն» առակայի հարցով առաջարկել են՝ շարունակվեն քննարկումները և փոխընդունելի, ճիշտ լուծման, եզրահանգման հանգել։

Ժ. Անդերասյանը, խոսելով «Հայ եկեղեցու պատմություն» առարկայի մասին, ասաց, որ եկեղեցու կողմից բարձրացված  մտահոգությունները կամ, ավելի ճիշտ, իրենց դիրքորոշումը, նոր չէ. «Կարծում եմ՝ արդեն անցել ենք քննարկումների փուլը,  քանի որ չափորոշչի քննարկման և հաստատման փուլում բազմիցս ունեցել ենք հնարավորություն այդ քննարկումների համար»։

Նրա խոսքով, իրենք շատ  ըմբռնումով են մոտենում և, չի կարծում, որևէ պարագայում  բոլոր հարցերում պետք է ունենալ մեկ մոտեցում  և մեկ տրամաբանություն։

«Շատ բնական է, որ կարծիքները կարող են տարբեր լինել, նույնիսկ  քննարկումներից հետո տարբեր էլ մնալ։ Բայց  շատ կարևոր եմ համարում, որ մենք կարողանում ենք բաց խոսել մեր տարբեր կարծիքների մասին ու գնահատում եմ։

Կարծում եմ՝ մենք բավականին բաց խոսակցություն ենք ունեցել, ներկայացրել եմ չափորոշչի մեր մոտեցումը, մեթոդաբանությունը, վստահեցրել եմ, որ այն պատկերացումները, որոնք մենք ունենք,  չպետք է վտանգեն այն կարևոր արժեքների փոխանցման հարցում, որոնք բոլորս կարևորում ենք, և տեսնում եմ, որ դիմացի կողմից, ամեն դեպքում, կա տարբեր ընկալում, որ ոչ՝ մեթոդը պետք է այլ լինի,  մոտեցումը պետք է լինի առանձին առարկայի տրամաբանության մեջ։

Մենք այդպես չենք պատկերացնում, նաև բացատրել եմ՝ ինչու»,- ասաց ԿԳՄՍ նախարարը։

Ըստ նրա, խոսքը վերաբերում է ոչ միայն «Հայ եկեղեցու պատմություն» առարկային, խոսքը վերաբերում է  ընդհանուր առմամբ տարբեր առարկաների մասով ուսուցմանը։

«Մենք ինտեգրված  մոտեցումն ենք որդեգրել հանրակրթության պետական չափորոշչով, և սա ունի շատ պարզ նպատակ։ Մենք դպրոցում ունեինք մի իրավիճակ, երբ  յուրաքանչյուր առարկա ինքնաբավ իր համար գործում էր, երեխաների մոտ հաճախ չէր ձևավորվում  միասնական պատկերացում, օրինակ, նույն բնության երևույթի մասին։ Ինտեգրված մոտեցումն այն մոտեցում է, որը հնարավոր է  դարձնում խաչվող գաղափարները  տարբեր առարկաների մեջ դարձնել ավելի հասկանալի, տեսանելի, ընկալելի։

Բոլոր  հետազոտությունները ցույց են տալիս, որ  երեխաների առաջադիմությունը միայն բարձրանում է, եթե մենք այդպես ենք մոտենում նրանց կրթությանը։

Կարծում եմ՝ այդ տրամաբանության շրջանակներում մեր մոտեցումները շատ հիմնավոր են։ Իհարկե, հարգանքով եմ վերաբերում եկեղեցու դիրքորոշմանը»,-ասաց Ժաննա Անդրեասյանը։