Ձեր վստահելի աղբյուրը

«Բանակը դառնում է հայկական, մեր բանակը հայկական չի եղել, բոլորդ լավ գիտեք, որ բոլորը նստած՝ հեռախոսներով, ՍՄՍ-ներով տեղեկություններ են հայտնել այլ երկրներին»,-կառավարության գործունեության ծրագրի 2022թ կատարողականի քննարկման ժամանակ ունեցած ելույթում հայտարարեց ՔՊ-ական պատգամավոր Խաչատուր Սուքիասյանը:

Պատգամավորը նախկին իշխանություններին մեղադրեց դրանում՝ հայտարարելով, որ այսօրվա իշխանությունը  կառուցելով գնում  է առաջ:

Սուքիասյանից հետո ելույթ ունեցած Հայկ Մամիջանյանը նրան հիշեցրեց, որ արդեն մեկ դատական գործով անցնում է Սերժ Սարգսյանի հետ և հիմա էլ կարող է անցնել երկրորդով՝ Հայկական բանակն ուրիշինը լինելու պնդման համար:

Պատգամավորը քննադատեց ընդդիմադիրների ելույթները՝ ասելով, որ եթե նրանք շարունակեն այդ կարգի կեղծ, առանց հիմնանավորման ելութներ  ունենալ, ապա մարդիկ նարնց ընդհանրապես ձայն չեն տալու:

Սուքիասյանը դիմեց «Հայաստան» խմբակցության պատգամավոր Ագնեսսա Խամոյանին՝ ասելով.  «2-րդ և 3-րդ նախագահները լավ ադրբեջանարեն էին խոսում Ադրբեջանի նախագահի հետ, ժպտում էին, մի հատ կարո՞ղ եմ իմանալ՝ էդ ի՞նչ էին խոսում: Էդ ի՞նչ ձև է, մի հատ էլ երկրի վարչապետին ասում է՝ «էդ ի՞նչ էիք բանակցում»: Ես էլ ասում եմ՝ որ ադրբեջաներեն իրա հետ խոսում էին, հիմա թող ասեն՝ ինչ են խոսել իր հետ ադրբեջաներեն 2-րդ և 3-րդ նախագահները: Երկուսն էլ ադրբեջաներեն էին խոսում, հիմա ես էդ հարցն եմ տալիս տիկին Խամոյանին»:

Անդրադառնալով արցախյան հակամարտության կարգավորման գործընթացին՝ Սուքիասյանը հարցրեց, թե ինչու 1991 թվականից միջազգային հանրությունը Ղարաբաղը չճանաչեց որպես անկախ պետություն կամ որպես Հայաստանի մաս:

«Թողել էին այլ երկրների քմահաճույքին: Այո, Սեյրան Օհանյանը, ես կարծում եմ՝ չի ստի, 90-ականներին էլ է մեր հաղթանակը պայմանավորված եղել այլ երկրների հետ, հիմիկվա պարտությունն էլ այլ երկրների հետ պայմանավորված է եղել, սա բոլորս գիտակցում ենք»,-հայտարարեց ՔՊ-ական պատգամավորը:

Շրունակելով քննադատել ընդդիմությանը՝ Խաչատուր Սուքիասյանը «Հայաստան» խմբակցությանը հորդորեց կոնկրետ ծրագրեր ներկայացնել, օրինակ ծնելիության խթանման համար:

«Եկեք մի հատ ծրագիր գրեք, ես էլ կոչ կանեմ, որ բոլոր հարուստ մարդիկ ֆինանսավորեն, ինչքան մարդ կա, կմասնակցենք: Ես ձեզ եմ ասում՝ որպես կուսակցություն: Շատ ժամանակ որ ես նստած եմ լինում այստեղ, տեսնում եմ՝ կեղծ ելույթ է, ես շուռ եմ գալիս, իմ ընկերոջն ասում եմ՝ բայց մեղք չե՞ն մեր մնացած պատգամավորները, որ այսպիսի կեղծ ելույթ են լսում, գոնե այս մարդկանց մի քիչ ավելի վճարենք»,-հայտարարեց Սուքիասյանը: