Ձեր վստահելի աղբյուրը

Շրջափակման հետևանքով առաջացած խնդիրներն ու դժվարություններն անտրտունջ հաղթահարելով՝ Արցախում անում են ամեն ինչ նաև Արցախից դուրս տեղի ունեցող մշակութային իրադարձություններից հետ չմնալու համար:

Ստեփանակերտի Կոմիտասի անվան երաժշտական դպրոցի սաներն այս տարի առաջին անգամ հեռավար ձևաչափով մասնակցել են մարտի 30-ից ապրիլի 2-ը կայացած` «Փարիզի աստղերը»  բանահյուսության, երաժշտության և պարի 24-րդ միջազգային մրցույթ-փառատոնին:

Մրցույթ-փառատոնը նպատակ ունի բացահայտել ստեղծագործական խմբերի և մենակատարների շրջանում տաղանդավոր կատարողներին և հնարավորություններ ստեղծել բեմում ստեղծագործական ներուժի լիարժեք բացահայտման համար, ինչպես նաև նպաստել միջազգային բարեկամական և մշակութային կապերի ամրապնդմանը, Եվրոպայի և աշխարհի տարբեր մասերից մասնակիցների փորձի փոխանակմանը, ուսուցիչների և առաջնորդների մասնագիտական ​​հմտությունների բարձրացմանը:

Մրցույթ-փառատոնին մասնակցում էին մենակատարներ, դուետներ, համույթներ ու ստեղծագործական խմբեր աշխարհի տարբեր երկրներից։ Ստեփանակերտի Կոմիտասի անվան երաժշտական դպրոցից 10-14 տարեկանների խմբում 8 աշակերտ ու մեկ համույթ է մասնակցել փառատոնին։

ԱՀ ԿԳՄՍ նախարարության հաղորդմամբ, միջազգային մրցույթ-փառատոնի Գրան Պրի  մրցանակին են արժանացել Վլադիմիր Գալստյանն ու Ինեսսա Բաբայանը:

Դպրոցի սաներ Ելենա Սայիյանը, Վլադիմիր Գալստյանը, Վիլեն Զաքարյանը, Անահիտ Գրիգորյանը, Միքայել Համբարձումովը և Սրբուհի Սարգսյանն արժանացել են առաջին մրցանակային տեղին, իսկ  Գայանե Պետրոսյանն ու Սաթենիկ Աթաջանյանը՝ երկրորդ մրցանակային տեղին։

Վերջին մեկ ամսվա ընթացքում սա երաժշտական դպրոցի սաների միջազգային փառատոններում ունեցած միակ մասնակցությունը չէ:

Կոմիտասի անվան երաժշտական դպրոցի սաները մարտի 18-ից ապրիլի 23-ը հեռավար ձևաչափով   մասնակցել են նաև Երևանում անցկացվող «Արտ Մյուզիք» արվեստի միջազգային փառատոնին:

Արցախցի պատանիները միջազգային  փառատոնին մասնակցել են  ստեղնային նվագարաններ (դաշնամուր, ակորդեոն) և վոկալ (ակադեմիական) անվանակարգերում:

Անհատական կատարողների միջև Անահիտ Գրիգորյանը, Գայանե Պետրոսյանը, Վիլեն Զաքարյանն ու Միքայել Համբարձումովն արժանացել են առաջին կարգի մրցանակի, Ելենա Սայիյանը՝ երկրորդ, Տամիլա Հայրապետյանը՝ երրորդ կարգի մրցանակի:

Վլադիմիր Գասպարյան-Ինեսսա Բաբայան դաշնամուրային դուետն արժանացել է փառատոնի երկրորդ կարգի մրցանակի: