Պետդումային պատգամավորի ճշմարիտ խոսքերը ցավալի ընդունելով՝ Ադրբեջանի դեսպանատնից հետո Մեջլիսն էլ է բողոք հղել ՌԴ-ին

Քաղաքական 10:51 22/04/2023 Տարածաշրջան

Պետդումային պատգամավորի ճշմարիտ խոսքերը ցավալի ընդունելով՝ Ադրբեջանի դեսպանատնից հետո Մեջլիսն էլ է բողոք հղել ՌԴ-ին

Ադրբեջանի Միլլի Մեջլիսի նախագահ Սահիբա Գաֆարովան հույս է հայտնել, որ Ադրբեջանի և Ռուսաստանի խորհրդարանականները համատեղ կկանխեն երկկողմ հարաբերություններին վնասող գործողությունները։ Այս կարծիքը Գաֆարովան հայտնել է Պետդումայի խոսնակ Վյաչեսլավ Վոլոդինին ուղարկված նամակում պատգամավոր Օլեգ Մատվեչևի՝ ապրիլի 20-ին հայկական «Ռուսարմինֆո»-ին տված հարցազրույցում արած հայտարարությունների պատճառով: Այդ մասին Ադրբեջանի խորհրդարանի մամուլի ծառայության տարածած հաղորդագրությանն անդրադարձել է ՏԱՍՍ-ը։

Հիշեցնենք, որ Մատվեյչևը, «Ռուսարմինֆո»-ին տված հարցազրույցում մեկնաբանելով Կրեմլի խոսնակ Դմիտրի Պեսկովի հայտարարությունը, ասել էր, որ Թուրքիային և Ադրբեջանին դուր չեն գալիս Հայաստանի և Ռուսաստանի ղեկավարների 2020 թվականին ձեռք բերած պայմանավորվածությունները։ Պատգամավորի խոսքով՝ Բաքուն և Անկարան փորձում են վերսկսել ղարաբաղյան հակամարտության ակտիվ փուլը և ջանում են սադրել հայկական կողմին պատասխան գործողությունների։ Պատգամավորը նաև հորդորել էր Հայաստանին չտրվել ադրբեջանական սադրանքներին՝ պահպանելով փխրուն խաղաղությունը:

Ըստ Գաֆարովայի՝ ռուս խորհրդարանականը պետք է հասկանար, որ նման հայտարարությունները ստվեր են գցում հայ-ադրբեջանական կարգավորման հարցում Ռուսաստանի Դաշնության միջնորդական գործունեության վրա։

Ապրիլի 20-ին էլ ՌԴ-ում Ադրբեջանի դեսպանատունը բողոքի նոտա է ներկայացրել ՌԴ ԱԳՆ՝ Մատվեչովի հայտարարությունների կապակցությամբ։ Դեսպանությունն անընդունելի է համարել նրա խոսքերը:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: