Ձեր վստահելի աղբյուրը

«Այո, մենք հիմա նոր ցեղասպանության խնդրի առաջ ենք կանգնած, և կոնկրետ անցակետը, որ տեղադրվել է միջանցք կոչված տարածքում, խոսում է այն մասին, որ կոնկրետ խնդիր է դրված 120 հազար մեր  արցախահայերի ցեղասպանությունն իրականացնել, կամ լավագույն դեպքում նրանց արտահոսքը, արտագաղթը կազմակերպել»,- Ծիծեռնակաբերդի հուշահամալիրում լրագրողների հետ զրույցում նշեց ԱԺ «Հայաստան» խմբակցության պատգամավոր Անդրանիկ Թևանյանը:

Նրա խոսքով, սրա մեղավորությունը պետք է նախևառաջ փնտրել Երևանի իշխանության մեջ:

«Ալիևը հանցագործ է, ինքն իր խնդիրն է լուծում, գիտեմ, որ մեր թշնամին է և նրա քայլերից չեմ զարմանում: Ես զարմացած ու զայրացած եմ Հայաստանի  իշխանության քայլերից, որը 2022-ի հոկտեմբերի 6-ին Պրահայում տվել է համաձայնություն, որ Արցախը պատկանում է Ադրբեջանին, դրանից հետո բնական է, որ Ադրբեջանը պետք է անցակետ տեղադրի: Հանցագործությունը կատարվել է, երբ Հայաստանի իշխանությունը համարել է Արցախն ադրբեջանական, դրանից հետո արդեն վերանում է «Լաչինի միջանցք» հասկացությունը, վերանում է Լեռնային Ղարաբաղ հասկացությունը  և վերանում է այն կարգավիճակը, որը պետք է հետագայում որոշվեր ԼՂ-ի համար»,-ասաց ընդդիմադիր գործիչը։

Անդրանիկ Թևանյանը հիշեցրեց անցած շաբաթ ԱԺ-ում կայացած քննարկումները. «Քաղաքացիական պայմանագիրը» Նիկոլ Փաշինյանի  գլխավորությամբ  ագրեսիվ քարոզ էր տանում, որ Արցախն ադրբեջանական է, դրանից հետո բնական է, որ անցակետ պետք է տեղադրվի: Պարահայում համաձայնության եկան, Լաչինի միջանցքը փակվեց, հիմա էլ ասացին՝ ադրբեջանական է,  անցակետն արդեն տեղադրում են։ Դա բնական է։

Հիմա կարող ենք ասել՝ ռուսները թող նոյեմբերի 9-ի համաձայնագրով պահպանեն միջանցքը, բայց ռուսները չեն կարող ավելի  հայկական քաղաքականություն վարել, քան Հայաստանի իշխանությունները: Եթե Հայաստանի իշխանությունն Ալիևի հետ համաձայնության է գալիս, Ռուսաստանն ի՞նչ պետք է անի, ինքը որպես արբիտր չի կարող ինչ-որ քայլ անել»:

Հարցին՝ Արցախի իշխանությունները դիմել են ՌԴ-ին, որպեսզի իրավիճակը շտկվի,  ի՞նչ կարելի է սպասել այս իավիճակում, Ա. Թևանյանն ասաց. «Մենք շատ քիչ, բայց առայժմ հնարավորություն ունենք իրավիճակը Երևանում փոխելու: Մինչև իրավիճակը չփոխենք կոնկրետ իշխանափոխության տեքստով, ոչ մի երկիր ոչ մի խնդիր չի լուծելու մեր փոխարեն ու մեզ համար: Արցախի իշխանությունները, եթե դիմում են Ռուսաստանին, թող Հայաստանի իշխանությանն էլ դիմեն, ասեն՝ դու իրավունք չունես Արցախը ճանաչել ադրբեջանական: Թող անեն այդ քայլը, հետո ակնկալեն մեր բարեկամներից ու դաշնակիցներից քայլեր:

Եթե Հայաստանի իշխանությունն Արցախը ճանաչում է ադրբեջանական, ոչ Իրանը, ոչ Ռուսաստանը ոչինչ չեն կարող անել։

Այս իշխանությունները խաբում են մեր ժողովրդին. ասում են՝ մենք Արցախը հանձնում ենք, որ Հայաստանը փրկենք, բայց իրականում համ Արցախն են հանձնելու, համ Հայաստանը, իրենց կաշին են փրկելու։ Նիկոլ Փաշինյանն առաջարակում է  իրեն գերադասել Հայաստանից ու Արցախից։ Կարծում եմ՝ հայ ժողովուրդն այդքան չի կորցրել իր մտածողությունն ու բնազդը, որպեսզի այդպիսի ընտրություն կատարի»,-ասաց Անդրանիկ Թևանյանը:

Նրա խոսքով, պետք է կազմակերպված համաժողովրդական լայն շարժում ձևավորել՝  խաղաղ, անցնցում իշխանափոխություն իրականացնելու համար. «Ինչքան շուտ, այնքն լավ։ Այլընտրանք չունենք։ Իսկ Արցախի իշխանությունները պետք է հասցեական Նիկոլ Փաշինյանին գնահատական տան: Իշխանություն ասելով նկատի ունեմ հենց կոնկրետ Արայիկ Հարությունյանին»: