Ձեր վստահելի աղբյուրը

«Ապրիլի 23-ին՝ հայոց ցեղասպանության տարելիցի նախօրեին, Ադրբեջանի ահաբեկչական ռեժիմը դավադրաբար փակեց Հակարի կամուրջը՝ խորացնելով Արցախի շրջափակումը»,-խորհրդարանում հայտարարեց «Հայաստան» խմբակցության պատգամավոր Արթուր Խաչատրյանը:

Պատգամավորի խոսքով՝ իրավիճակը ճգնաժամային է հատկապես Շուշիի շրջանի գյուղերում, քանի որ վերջիններս կտրվել են Հայաստանից և  Արցախից:

Հայտնելով, որ Ադրբեջանի հերթական թշնամական գործողությունը ի ցույց է դնում նրանց իրական մտադրությունը՝ Արթուր Խաչատրյանն ասաց, որ նրանց նպատակն է հայաթափել Արցախը, իր պատմական հայրենիքում բնակվող քաջարի արցախցիներին պարտադրել լքել իրենց բնօրրանը:

«Սակայն թուրք-ադրբեջանական հանցախմբի նպատակը միայն Արցախի հայաթափումը չէ: Ադրբեջանն այժմ թիրախավորում է Հայաստանի Հանրապետությունը՝ սպառնալով մեր ինքնիշխանությանը, տարածքային ամբողջականությանը և նույնիսկ՝ որպես անկախ պետականություն մեր գոյությանը»,-հայտարարեց ընդդիմադիր պատգամավորը::

Նշելով, որ ինչպես Հայաստանն է համարվում Արցախի անվտանգության երաշխավորը, այնպես էլ Արցախն է համարվում Հայաստանի անվտանգային համակարգի հենասյունը՝ Խաչատրյանը հավելեց. «Ցավոք, Հայաստանի իշխանությունները չունեն այդ գիտակցումը: Ադրբեջանը լկտիացել և փակել է Քաշաթաղի միջանցքը, երբ ՀՀ իշխանություններն իրենց փաստացի օտարեցին Արցախից՝ հայտարարելով, որ Արցախն ու Ադրբեջանը պետք է ուղիղ բանակցեն միմյանց հետ, իսկ Հայաստանն այնտեղ անելիք չունի:

Այսօր՝ այս ճակատագրական պահին, մենք պետք է վերահաստատենք մեր աջակցությունը հերոսական Արցախին: Հայաստանը չի կարող լոկ փաստացի արձանագրողի դեր ստանձնել, երբ ցեղասպանվում են մեր հայրենակիցները: Հայաստանի Հանրապետությունը պարտավոր է հայտարարել, որ արցախյան հակամարտությունը կարգավորված չէ, իսկ վերջանական կարգավորումը պետք է հիմնված լինի ժողովուրդների իրավահավասարության և ինքնորոշման սկզբունքի հիման վրա: Մենք կոչ ենք անում ՌԴ խաղաղապահ առաքելությանը կատարել իր ստանձնած պարտավորությունները, ապահովել Հայաստանի և Արցախի միջև անխափան կապը և գործուն միջոցներ ձեռնարկել հետագայում նման ոտնձգությունները կանխելու ուղղությամբ»:

Ընդդիմադիր պատգամավորը նաև կոչ հղեց միջազգային հանրությանը՝ ճնշում գործադրելու ադրբեջանական ռեժիմի վրա՝ պահանջելով վերացնել Արցախի շրջափակումը և հարգել իր ճակատագիրը տնօրինելու Արցախի ժողովրդի իրավունքը: