Ձեր վստահելի աղբյուրը

Ամերիկայի հայկական համագումարը ողջունում է նախագահի հայտարարությունը Հայոց ցեղասպանության և Օսմանյան Թուրքիայի կողմից 1,5 միլիոն հայերի սիստեմատիկ կոտորածներն արձանագրելու մասին։

«Համագումարը խորին շնորհակալություն է հայտնում Բայդեն-Հարիս-ի վարչակազմին, Կոնգրեսին և անցյալ տասնամյակների բոլոր այն առանցքային գործիչներին, ովքեր հանձնառու էին Հայոց ցեղասպանության հարցում ԱՄՆ-ի ազնիվ քաղաքականության ամրապնդմանը: Մենք նաև խորին երախտագիտություն ենք հայտնում ընտրված պաշտոնյաներին, գիտնականներին, մարդու իրավունքների ջատագովներին և բոլոր անհատներին ու կազմակերպություններին, ովքեր հավատում են մարդու իրավունքների վերաբերյալ կրթության և ցեղասպանությունների կանխարգելման կարևորությանը:

Ամերիկայում գրանցված առաջին հայը բնակություն է հաստատել Ջեյմսթաունի գաղութում 1607թ.-ին: Այժմ ամերիկահայերի ու նրանց հարազատների թիվը ԱՄՆ-ում մոտենում է 2 միլիոնին, հիմնականում՝ Հայոց ցեղասպանության հետևանքով: Հայաստանի և Արցախի հետ ամերիկյան մշտական կապերը, որոնք հիմնված են իրական ընդհանուր արժեքների վրա, ներառյալ՝ ժողովրդավարությունը, այժմ գտնվում են կրիտիկական կետում, մինչ Ադրբեջանում Ալիևի վարչակարգը՝ Թուրքիայում Էրդողանի վարչակարգի հետ միասին, առաջընթաց են գրանցում հայկական բնակչությանը և մշակույթը ոչնչացնելու ուղղությամբ, որոնք կանգուն են մնացել հազարամյակների ընթացքում:

1982թ.-ի ապրիլի 22-ի հռչակագրում նախագահ Ռոնալդ Ռեյգանը զգուշացրել էր, որ Հայոց ցեղասպանության դասերը չպետք է մոռացվեն: Մենք գիտենք, որ ներկայիս վարչակազմը մասնավոր կերպով ճանաչել է, որ հայերը կրկին բախվում են ցեղասպանությանը: Նախագահ Բայդենը ներառեց նմանատիպ, ճիշտ ժամանակին արված ուղերձ՝ «հիշելու և երաշխավորելու, որ 108 տարի առաջ տեղի ունեցած ցեղասպանությունն այլևս երբեք չկրկնվի»: Սա կոչ է՝ լրացուցիչ գործողություններ ձեռնարկել վտանգի տակ գտնվող հայերին պաշտպանելու համար, մինչ մենք ակնկալում ենք Միացյալ Նահանգների ուժեղ դերակատարումը երկու նախագահների և բոլոր բարեխիղճ մարդկանց խոսքերին ականջալուր լինելու հարցում՝ ցեղասպանությունը հայերի դեմ և ամբողջ աշխարհում ցեղասպանությունը դադարեցնելու հստակ գործողություններով։

«Մինչ մենք ոգեկոչում ենք 20-րդ դարի առաջին ցեղասպանությունը, մենք պետք է երաշխավորենք, որ պատմությունը չի կրկնվի և թույլ չտանք, որ տեղի ունենա երկրորդ Հայոց ցեղասպանությունը»,– հայտարարեց Համագումարի գործադիր տնօրեն Բրայան Արդունին:

«Մենք կոչ ենք անում Միացյալ Նահանգներին և միջազգային հանրությանը լրացուցիչ քայլեր ձեռնարկել վտանգի տակ գտնվող հայերին պաշտպանելու համար»»,-ասված է համագումարի տարածած հայտարարության մեջ։