Ձեր վստահելի աղբյուրը

«ԵՄ առաքելությունն ադրբեջանական կողմին տեղեկացնում է միայն իր պարեկային երթուղու մասին»,-ի պատասխան Panorama.am-ի գրավոր հարցման արձագանքել են արտաքին գործերի նախարարույունից։

Հիշեցնենք, որ օրեր առաջ  Եվրոպական հեղինակավոր Politico  պարբերականը Հայաստան-Ադրբեջան հարաբերություններին վերաբերող իր հոդվածում մեջբերել է ԵՄ անանուն բարձրաստիճան մի պաշտոնյայի խոսք, որի համաձայն, ԵՄ դիտորդական առաքելությունը պարեկների գործունեության վերաբերյալ, ինչպես նաև այլ տեղեկություններ տրամադրում է Ադրբեջանին։



Հրապարակման հետքերով Panorama.am-ը գրավոր հարցում է ուղղել ԱԳ նախարարություն՝ հետաքրքրվելով.

1. Մինչ այս հրապարակումը ՀՀ կառավարությունը, ԱԳ նախարարությունը, ԱԽ գրասենյակը տեղյակ եղե՞լ են, որ տեղեկություններ են փոխանցվում Բաքվին։
2. Եթե այո, ապա դա համաձայնեցվա՞ծ է եղել ՀՀ-ի հետ, եթե ոչ, ի՞նչ քայլեր են ձեռնարկվել հրապարակումից հետո։ Ինչպե՞ս եք գնահատում ԵՄ առաքելության այդ քայլը։
3. Հայաստանի Հանրապետությունը տեղյա՞կ է, թե ինչ բնույթի և ծավալի ինֆորմացիա է փոխանցվում թշնամի երկրին։
4. Հնարավո՞ր է այս հրապարակումից հետո քննարկվի ԵՄ առաքելության՝ Հայաստանում հետագա գործունեության նպատակահարմարությունը։

Ապրիլի 11-ին նախարարություն ուղարկված հարցմանը պատասխանել են այսօր՝ ապրիլի 26-ին.

«Ի պատասխան Ձեր հարցման տեղեկացնում ենք, որ ԵՄ քաղաքացիական մշտադիտարկման առաքելությունն իր գործունեությունն իրականացնում է 2023 թ. հունվարի 23-ին ԵՄ խորհդրի կողմից ընդունված որոշմանը համաձայն և դրանով նախատեսված մեխանիզմներով՝ Հայաստանի Հանրապետության ինքնիշխան տարածքում։

Առաքելությունն իր գործառույթների իրականացման շրջանակներում մշտական կապի մեջ է  ՀՀ համապատասխան գերատեսչությունների հետ, որոնք տեղեկացված են, որ անվտանգության նկատառումներից ելնելով, ԵՄ առաքելությունն ադրբեջանական կողմին տեղեկացնում է միայն իր պարեկային երթուղու մասին, որպեսզի ԵՄ առաքելության ավտոշարասյան տեղաշարժը թյուրըմբռնման և լարվածության առիթ չհանդիսանա»։