Ձեր վստահելի աղբյուրը

Հայաստանի Հանրապետության ինքնիշխան տարածք ներխուժած ադրբեջանցի երկու զինծառայողներին, ինչպես ավելի վաղ հայտնել էինք, բռնել էին հենց քաղաքացիներն ու հանձնել իրավապահներին։ Ադրբեջանում արդեն քրեական գործ է հարուցվել՝ ապրիլի 13-ին Հայաստանում քաղաքացիների կողմից բռնված ադրբեջանցի զինծառայողին իբր խոշտանգելու համար (բռնելիս քաղաքացիները մի-երկու հատ հարվածել էին սահմանախախտ-մարդասպան  դիվերսանտին):  Մինչդեռ 2020 թ. 44-օրյա պատերազմի ընթացքում ու դրանից հետո հենց ադրբեջանցիներն էին պարբերաբար տեսանյութեր տարածում, թե ինչպես են խոշտանգում հայ զինծառայողներին, քաղաքացիական անձանց։

Panorama.am-ը դիմեց ՀՀ գլխավոր դատախազություն՝ հարցով, թշնամու կողմից հայ զինծառայողներին խոշտանգման փաստերով կա՞ գոնե մեկ հարուցված քրեական գործ, եթե այո, ներկայացրեք մանրամասներ, եթե ոչ՝ ինչո՞ւ։

Գլխավոր դատախազությունից պատասխանել են. «2020 թվականի պատերազմից հետո հայ զինծառայողների խոշտանգման փաստերի առթիվ հարուցված են մի շարք քրեական գործեր։
Վարույթի համար էական նշանակություն ունեցող մի շարք, այդ թվում՝ հայրենադարձված զինծառայողների խոշտանգված լինելու հանգամանքները պարզելու նպատակով նշանակվել են դատաբժշկական փորձաքննություններ և ստացվել դրանց եզրակացությունները։

Քննվող վարույթների վերաբերյալ առավել մանրամասն տեղեկատվություն հնարավոր չէ տրամադրել, քանի որ այն հանդիսանում է նախաքննական գաղտնիք և տվյալ փուլում հրապարակման ենթակա չէ»։

Հիշեցնենք, որ պատերազմական գործողությունների ժամանակ գերի ընկածների իրավունքները պաշտպանվում են միջազգային օրենքներով, ու համեմատել նրանց խաղաղ պայմաններում սահման խախտած, դիվերսիա իրականացրածի հետ՝ ճիշտ չէ։