Ձեր վստահելի աղբյուրը

Ռուսաստանի և Հայաստանի միջև ապրանքաշրջանառությունը դժվարացել է «Վերին Լարս» անցակետի ցածր թողունակությամբ։ «Ինտերաքս»-ի փոխանցմամ,  այս մասին հայտարարել է  «Wildberries»-ի հիմնադիր և գլխավոր տնօրեն Տատյանա Բակալչուկը:

Նշվում է, որ ՌԴ-ն և ՀՀ-ն ընդհանուր սահման չունեն, բայց հնարավոր է Հայաստան մուտք գործել Վրաստանի տարածքով, և «Վերին Լարս» անցակետը Ռուսաստանի և Վրաստանի միջև միակ օրինական ցամաքային անցումն է։

Ելույթ ունենալով«Հարկային էկոհամակարգ. մարդիկ և տեխնոլոգիաներ» ֆորումում, Տատյանա Բակալչուկն ասել է, որ իրավիճակը կարող է վատթարանալ ամռանը, երբ Հայաստանում սկսվի  ծիրանի բերքահավաքը։

«Մենք մշտապես խնդիրներ ունենք «Վերին Լարս» մաքսակետի հետ։ Կարծում եմ, նրանք, ովքեր նույնպես օգտվում են այս ճանապարհից, տեղյակ են դրա մասին: Այստեղ խնդիրը  ոչ թե փաստաթղթերի հետ է կապված, այլ զուտ ֆիզիկապես տվյալ անցակետը չի կարող մեծ թվով մեքենաներ բաց թողնել, չնայած այն հանգամանքին, որ 2022 թվականին գոտիների թիվը երեքից հասել է վեցի», - դժգոհել է Բակալչուկը։

«Wildberries»-ի հիմնադիր նաև նշել է, որ տվյալ ուղղությամբ լոգիստիկա  կառուցելու վերաբերյալ վերջերս տեղի ունեցած քննարկումների ընթացքում առաջարկ է հնչել դիտարկել ծովով այլընտրանքային ճանապարհը, քանի որ ամռանը, երբ Հայաստանից սկսեն ծիրան արտահանել, այդ ժամանակ ոչ ոք չի կարողանա ապրանք տեղափոխել։