Ձեր վստահելի աղբյուրը

Ֆեյսբուքյան սոցիալական ցանցում տարածվում է մի տեսանյութ, որտեղ միջոցառման ներկաներից մեկը, տեսնելով ՔՊ-ական պատգամավոր Վիլեն Գաբրիելյանին, անվանում է դավաճան։

«Նավակ Ճոճո՞ղ։ Դավաճաններն ի՞նչ գործ ունեն այստեղ, տիկին Խառատյան»,-բղավում է քաղաքացին։

Դատելով տեսանյութում լսվող ելույթ ունեցողի ձայնից՝ քաղաքացին դիմում է Հրանուշ Խառատյանին։

Ավելի վաղ վերջինը տեղեկացրել էր, որ Ադրբեջանից, Նախիջևանից և Արցախից 1988-1992թթ. և 2020թ. ադրբեջանական իշխանությունների ռասիստական, հայատյաց, ցեղասպանական գործողությունների հետևանքով փախած, բռնի տեղահանված, ռազմական հանցագործ գործողությունների պատճառով հայրենիքը լքած, ներկայումս Հայաստանի Հանրապետությունում և այլուր ապրող փախստականների հարցերով զբաղվող մի շարք հասարակական կազմակերպություններ ապրիլի 29-ին` ժամը 12:00-ին, Երևանում` Կարեն Դեմիրճյանի անվան մարզահամերգային համալիրի համերգային դահլիճում, կազմակերպում են «Ադրբեջանական ագրեսիայի հին և նոր փախստականները. անցյալը, ներկան, ապագան» թեմայով համաժողով:

Միջադեպն ամենայն հավանականությամբ տեղի է ունեցել հենց այս համաժողովի ընթացքում։

Նշենք, որ Գաբրիելյանը մինչ պաշտոնյա դառնալը սոցցանցերում ու իր շրջապատում ներկայանում էր որպես Նավակ ճոճող։ Վերջին օրերին տարբեր վայրերում քաղաքացիները դավաճան են անվանել Ալեն Սիմոնյանին, Տիգրան Ավինյանին, Նիկոլ Փաշինյանին։