Ձեր վստահելի աղբյուրը

Ազգային ժողովի հերթական նիստի սկզբում «Հայաստան» խմբակցության պատգամավոր Գեղամ Մանուկյանը հետաքրքրվեց, թե ի՞նչ հանգամանքով, ի՞նչ նպատակով է Հայաստանի և Ադրբեջանի ԱԳ նախարարների վաշինգտոնյան բանակցություններին մասնակցում ԱԺ փոխնախագահ Ռուբեն Ռուբինյանը։

«Երեկ հայտնի դարձավ, որ Վաշինգտոնում Արարատ Միրզոյանի գլխավորած  պատվիրակությունը հանդիպել է  Ադրբեջանի ԱԳ նախարարի հետ։ Պատվիրակության կազմում էր Ալեն Սիմոնյանի ստորագրած որոշմամբ նաև ԱԺ  փոխնախագահ Ռուբեն Ռուբինյանը։

Հայտնի է, որ Ռուբինյանը Հայաստանի կողմից Թուրքիայի հետ բանակցությունների բանագնացն է։ Հարց՝  Ռուբեն Ռուբինյանը ի՞նչ հանգամանքով, ի՞նչ նպատակով, ի՞նչ կարգավիճակով է մասնակցում Հայաստանի և Ադրբեջանի ԱԳ նախարարների բանակցություններին, արդյո՞ք  հայ-ադրբեջանական բանակցությունների մեջ է  նաև հայ-թուրքական հարաբերությունները և այդ  երկու  հարաբերությունները իրար փոխկապակցված են»,- հարցրեց ընդդիմադիր պատգամավորը։

ԱԺ փոխանախագահ Հակոբ Արշակյանն ասաց, որ պարոն Ռուբինյանը բազմիցս այստեղից այս հարցին պատասխանել է, նա Հայաստանի կողմից ներկայացված է Թուրքիայի հետ բանակցություններում, ըստ էության, իր գործառույթներն է կատարում։

«Ինչ վերաբերում է  իր գործուղմանը, պարոն Սիմոնյանի հրամանի մեջ ամեն ինչ ասված է»,- նշեց ԱԺ փոխնախագահը։

Գեղամ Մանուկյանն ասաց. «Անակնկալ հայտարարվեց, որ Վաշինգտոնում Հայաստանի և Ադրբեջանի ԱԳ նախարարների հանդիպում է  լինելու, հանդիպումից առաջ կամ ընթացքում հայտարարվեց, որ բազմափուլ է,  մի քանի օր շարունակ այդ հանդիպումները տևելու են։ Հատկանշական է, որ Ալեն Սիմոնյանի ստորագրած կարգադրությամբ Ռուբինյանի գործուղումն ապրիլի 28-ից մայիսի 5-ն է, որը նշանակում է՝ ենթադրվում էր, ի սկզբանե հայտնի էր, որ մի քանի օր շարունակ բանակցություններ են լինելու։

Նորից պետք է արձանագրել՝ հայ ժողովրդի թիկունքում ստվերային, գաղտագողի տեղի են ունենում գործընթացներ, տարբեր ձևաչափով հանդիպումներ, որոնք վտանգում են Հայաստանի, Արցախի անվտանգությունը, հարվածի տակ է դնում մեր ժողովրդին, պետականությունը, ազգային անվտանգությունը»։

Հակոբ Արշակյանն արձագանքեց. «Ճիշտն ասաց զարմացած եմ պարոն Մանուկյան, որ ձեզ համար նորություն է, որ բանակցություններ են տեղի ունենում։ Առաջարկում եմ հետևել ԱԳ նախարարության հաղորդագրություններին»։ 

«Հայաստան» խմբակցության պատգամավոր Արթուր Խաչատրյանն ասաց, որ Գեղամ Մանուկյանի հարցի մեջ շեշտն այն էր, թե ինչո՞ւ է Ռուբեն Ռուբինյանը մասնակցում բանակցություններին, որտեղ թուրքերը, ոնց որ թե չկան. «Ըստ հաղորդագրութունների, պաշտոնական լուրերի բանակցությունների օրակարգը հայ-ադրբեջանական հարաբերություններն են։ 

Հարցը հետևյալն էր՝ արդյոք Հայաստանի իշխանությունները հայ-ադրբեջանական ու հայ-թուրքական հարաբերությունների «կարգավորումը» շաղկապում են իրար հետ, այսինքն ենթարկվում թուրքական հերթական նախապայմանին։ Թուրքերը դեռ 1991-92 թվականներից դա էր ասում, որ Հայաստան-Թուրքիա հարաբերությունները երբեք չեն կարող կարգավորվել, քանի դեռ չեն «կարգավորվել» Հայաստան-Ադրբեջան հարաբերությունները։ 

Կամ էլ ավելի պարզ լուծում կա՝ ԱԳ նախարարությունը չի կարողանում կարգավորել Հայաստան-Ադրբեջան հարաբերությունները և Ռուբեն Ռուբինյանը, որպես նախկին ԱԳ փոխնախարար, լծվել է այդ աշխատանքին։  Բայց, կարծում եմ, հասկանում եք՝ երկրորդ տարբերակը իրականության հետ որևէ աղերս չունի, և մենք տեսնում ենք, որ Հայաստանի իշխանությունները հերթական անգամ ընկրկել են թուրքական պահանջների առջև»։ 

Ի պատասխան ԱԺ ՔՊ-ական պատգամավորների դիտարկումներին՝ Գեղամ Մանուկյանի «գաղտագողի գործընթացներ» արտահայտության հետ կապված, Մանուկյանը մանրամասնեց. «Գաղտագողին այն է, երբ որ բանակցությունների հանդիպումից հետո  մեկ էլ ԱՄՆ պետդեպարտամենտն ասում է՝ քննարկման կետերից  մեկը երկու երկրների էթնիկ փոքրամասնությունների իրավունքների հարցն է, գաղտագողին այն է, որ  Արայիկ  Հարությունյան-Նիկոլ Փաշինյան դավաճանական տանդեմով օրինականացրեցին ադրբեջանական մաքսակետը, արցախահայերին տանելով-բերելով այդ մաքսակետով, աշխարհին ասելով, որ սահմանները կարող են նորմալացնել»։ 

Հակոբ Արշակյանը կոռեկտության կոչ արեց։ 

«Կոռեկտը ես գիտեմ։ Իսկ ինչու ԱԺ փոխնախագահ Ռուբեն Ռուբինյանը, ով Թուրքիայի հետ բանակցողն է, գնում է Ադրբեջանի հետ բանակցություններին, որով Ադրբեջան- Թուրքիա հարաբերությունները բերել, շաղկապել է։ 2007-ին էլ Թուրքիայի քիթը կջարդեին Ադրբեջանի հետ բանակցություններում մի վայկյան քիթը խոթելու համար»։ 

ՔՊ-ական պատգամավոր Գևորգ Պապոնյանն ասաց, որ Աժ-ում եղած պոտենցիալը պետք է օգտագործել։

«Եթե ձեր մեջ կա մեկը, ով կարող է թուրքերի հետ լավ բանակցել,  եկեք դուք էլ ներառվեք, գնացեք, բանակցեք, ի՞նչ ա եղել», նշեց Պապոյանը՝ դիմելով ընդդիմությանը։