Ձեր վստահելի աղբյուրը

«Նախորդ շաբաթ գրառում էր տեղադրվել ֆեյսբուքում, որտեղ կար բողոք մեր վարորդներից մեկի ոչ հարիր պահվածքի մասով»,-Երևանի քաղաքապետարանի գործակարգավարական խորհրդակցության ժամանակ հայտարարեց քաղաքապետի առաջին տեղակալ Լևոն Հովհաննիսյանը:

Նա հայտնեց, որ գրառման մեջ ասվում էր, որ վարորդը ավտոբուսը վարելու ընթացքում իրեն ագրեսիվ է պահել, ծխել է, ծխախոտի մնացորդը դուրս է նետել և պարբերաբար ուղևորներին հորդորել է մանրադրամը փոխանցեն իրեն:

«Երևանի ավտոբուս» ՓԲԸ-ի տնօրեն Հովհաննես Մանուկյանն արձագանքեց. «Ավտոբուսներում կան տեսախցիկներ, երբ այդ տեղեկությունը տարածվեց, մենք այդ մեքենայից հանեցինք տեսախցիկի չիպը և, այո՛, հաստատվեց, որ վարորդն իրեն շատ վատ է պահել: Նա նաև ուղևորից պահանջել է, որ մանրադրամն իրեն տան և չի թողել, որ գցեն արկղի մեջ: Այո, ծխել է և ծխախոտը դուրս է նետել, այդ ամենը մեր մոտ ֆիքսված է: Այդ վարորդը հեռացվել է աշխատանքից»:

Մանուկյանը հայտնեց, թե ամենօրյա ռեժիմով վարորդներին հորդորում են, որ ղեկին չծխեն և սափրված լինեն:

«Եթե կլինեն վարորդներ, որոնք կշարունակեն ծխել հայտնաբերվելուց հետո կհեռացվեն աշխատանքից»,-հայտնեց «Երևանի ավտոբուս» ՓԲԸ-ի տնօրենը:

Լևոն Հովհաննիսյանը քաղաքացիներին հորդորեց, որ ավտոբուս բարձրանալուց ունենան 100-դրամանոց, այն անմիջապես գցեն արկղը և չտան այդ վարորդին, որպեսզի գումարները մտնեն քաղաքային բյուջե և քաղաքային իշխանությունները կարողանան շարժակազմը թարմացնել:

Քաղաքապետի տեղակալը նաև հորդորեց, որ ավտոբուսների տեսախցիքկները սարքին վիճակում պահեն, իսկ միջադեպի մասին տեսաձայնագրությունը փոխանցել քաղաքապետարանի Լրատվության վարչություն, որպեսզի սոցիալական բնույթի տեսահոլովակ նկարահանվի այդ պատմության շուրջ: