Աննա Վարդապետյան. Հայաստանում քաղբանտարկյալներ չկան

Իրավունք 14:14 03/05/2023 Հայաստան

Աննա Վարդապետյան. Հայաստանում քաղբանտարկյալներ չկան

«Մենք ոչ ներպետական, ոչ միջազգային մակարդակում քաղբանտարկյալների առկայությունը հիմնավորող որևէ տվյալ չունենք»,- Ազգային ժողովում հայտարարեց գլխավոր դատախազ Աննա Վարդապետյանը։

Նա նշեց, որ բոլոր այն անձինք, որոնք զբաղվել են քաղաքական գործունեությամբ, բայց մեղադրվում են, օրինակ, կոռուպցիոն հանցագործությունների մեջ, դա մեխանիկական հիմք չէ այդ անձանց քաղաքական հետապնդման ենթարկելու մասին դատողություն անելու տեսանկյունից։ Ըստ դատախազի, դատարան գնացած գործերի մեղադրանքներն առավելապես ֆինանսական ու կոռուպցիոն բնույթի հանցագործություններ են ու քաղաքական որևէ տարր չեն պարունակում։

«Հայաստան» խմբակցության պատգամավոր Արմենուհի Կյուրեղյանը հարցրեց. «Միգուցե կոռուպցիոն սարքած գործ լինի, բայց արդյոք դրանք քաղաքական հետապնդման արդյունք չե՞ն, քաղաքական հետապնդման նպատակով նրանց վրա գործեր են կարվել։ Մամիկոն Ասլանյանի գործը որպես վկայություն»։

Աննա Վարդապետյանն արձագանքեց. «Իմ դիրքորոշումն այն է, որ ոչ, այստեղ որևէ քաղաքական մոտիվ էլ չկա։

Մեր աշխատանքը դատախազությունում կառուցված է բացառապես փաստի վրա և այսօր, եթե նայեք դատարան գնացած գործերը, օրինակ, դրվագները, որոնք չեն ներառվել մեղադրանքի մեջ, կտեսնեք, որ կան գործեր, որոնցով մեղադրանքը, օրինակ, մինչև դատարան գնալը 80 տոկոսով փոփոխվել է ֆինանսական քննության ու փաստաթղթահեն ուսումնասիրություն է իրականացվել, քննություն է իրականացվել։ Սա դատախազության հիմնական աշխատանքի ձևաչափն է, ու կոռուպցիայի դեմ պայքարը մեզ համար առաջնահերթություն է։

Ցավոք սրտի, կոռուպցիայի համակարգային բնույթը ենթադրել է նաև քաղաքական ու բարձր պաշտոններ՝ պետության հետ փոխկապակցված մեծ ընկերություններում, բայց էլի դրդապատճառները ֆինանսական են ու կոռուպցիոն»:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: