Ձեր վստահելի աղբյուրը

«Ակնհայտ է, որ «2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով» ստեղծված Ազգային ժողովի քննիչ հանձնաժողովի գործունեությունն ուղիղ առնչվում է Նիկոլ Փաշինյանին մաքրագործելու իրողության և ցանկության հետ»,- խորհրդարանական ճեպազրույցների ժամանակ ասաց անկախ պատգամավոր Թագուհի Թովմասյանը։

Նա նշեց, որ բոլոր հնարավոր ձևերով  այդ հանձնաժողովի գործունեությունը  նպաստում է և միտված է, որպեսզի Փաշինյանին  պատերազմի բոլոր հնարավոր հանցանքներից մաքրի։

«Չի կարող իշխանությունը քննել իր ենթադրյալ հանցագործության վարկածը։ Սա ուղղակի աբսուրդ է։ Սովորաբար քննիչ հանձնաժողովները  գործիք են ընդդիմության ձեռքին, ոչ թե իշխանությունն է դա օգտագործում»,- ասաց Թովմասյանը։

Հիշեցնենք, որ «2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով» ստեղծված Ազգային ժողովի քննիչ հանձնաժողովի գործունեության ժամկետը երկարաձգվել է ևս վեց ամսով։

Թ.Թովմասյանն անդրադարձավ ԱԺ-ում դատախազության 2022 թվականի գործունեության մասին հաղորդման ներկայացմանը, որի ժամանակ գլխավոր դատախազ Աննա Վարդապետյանը հայտարարել է, որ «մարտի 1-ի գործը դեռևս գտնվում է նախաքննության փուլում: Այսինքը՝ նախաքննության փուլում քրեադատավարական իմաստով բացահայտված վարույթ չկա»։

«Ստացվում է, որ անցնող հինգ տարիների ընթացքում այս գործը չի բացահայտվել, այն  դեպքում, երբ որ Նիկոլ Փաշինյանն ասում էր, որ դա ուչաստկովի  մակարդակի բացահայտման գործ է, շատ հեշտ, ընդամենը  խանգարում է  իշխանափոխությունը, հենց երկրում եղավ իշխանափոխություն, «մարտի 1»-ի գործն անխուսափելիորեն կբացահայտվի։ Իշխանափոխություն տեղի ունեցավ, այս գործը չի բացահայտվում, Փաշինյանի այդ խոստումն էլ ի կատար չի ածվել։

Նիկոլ Փաշինյանի օրոք հինգ տարի այս գործն ուսումնասիրեց Արթուր Դավթյանը, վստահ եմ՝ ևս հինգ տարի կուսումնասիրի Աննա Վարդապետյանը, վերջնարդյունքում ստացվում է, որ Փաշինյանի իշխանության օրոք մարտի 1-ի գործով տեղի ունեցավ մեկ հիշարժան իրողություն, որ արձան բացվեց»։

Նա հայտնեց, որ այսօր «Մոսկվա» կինոթատրոնի մոտ շարունակվելու է  իր նախաձեռնած ստորագրահավաքը. «Իմ աջակցությունն եմ այդպիսով հայտնում Արցախում սկսած «Ոչ էթնիկ զտմանը» ստորագրահավաքին, պահանջում են, որպեսզի Բերձորի միջացքում ապօրինի տեղադրված անցակետը հեռացվի։ 1 ժամ 45 րոպեում հավաքել ենք 200-ից ավելի ստորագրություն, այսօր այնտեղ կլինենք ժամը 12։00-20։00 –ից։ Նպատակ ունենք շատ ավելի շատ ստորագրություն հավաքել՝ համայն աշխարհին համոզելու, որ Հայաստանն ու հայ քաղաքացին միասնական է, Արցախի հարցում երբեք չեն կարող պատկերացնել կամ ընդունել այն հրամցվող  տեսակետը, որ Արցախը կարող է լինել Ադրբեջանի կազմում»,- ասաց Թովմասյանը։