Ձեր վստահելի աղբյուրը

«Օրինագծով նախատեսվում է մարզային մակարդակում ունենալ Քրեական ոստիկանության գլխավոր վարչության անմիջական ենթակայությամբ գործող տարածքային ստորաբաժանումներ»,-կառավարության նիստում հայտնեց ՆԳ նախարար Վահե Ղազարյանը՝ զեկուցելով «Ոստիկանությունում ծառայության մասին» օրենքում լրացումներ և փոփոխություններ կատարելու մասին օրենքի նախագիծը:

Նախարարը հայտնեց, որ նոր ստեղծվող ստարաբաժանումներին կվերապահվի միայն ծանր և առանձնապես ծանր հանցագործությունների բացահայտման, օպերատիվ կանխարգելման և հետախուզվողների հայտնաբերման նպատակով օպերատիվ-հետախուզական գործունեության իրականացումը:

Ղազարյանն ասաց, որ քրեական ոստիկանության տարածքային ստորաբաժանումների ձևավորումից հետո ներկայումս մարզային վարչությունները լուծարվելու են, իսկ նոր տարածքային ստորաբաժանումների ձևավորման համար նախագծով առաջարկվում է բաց մրցույթ, ինչպես պարեկային ծառայության դեպքում:

«Նախատեսվում է իրականացնել նաև պաշտոնային անվանափոխություն` օպերլիազորից անցնելով քրեական ոստիկանի պաշտոնի: Այս ստորաբաժանումները առավել թիրախային կրթական ծրագրի շրջանակներում օպերատիվ կերպով համալրելու համար կմշակվի և կիրականացվի քրեական ոստիկանի որակավորման մեկանգամյա նախնական կրթական ծրագիր, որին կարող են մասնակցել առնվազն բակալավրի որակավորում ունեցող քաղաքացիները և ոստիկանության գործող ծառայողները»,-հայտնեց ՆԳ նախարարը:

Նրա խոսքով՝  օրենսդրական փոփոխությունների միջոցով սահմանվելու է, որ քրեական ոստիկանությունում պաշտոնի նշանակվելու պայմաններն են լինելու պարեկային ծառայության կոնկրետ պաշտոնում ծառայության որոշակի ստաժը և ապագայում ներդրվելիք քրեական ոստիկանի որակավորման միջին մասնագիտական կրթական ծրագրով կրթություն ստանալը:

«Նախագծով առաջարկվում է սահմանել, որ համայնքային ոստիկանության, Պարեկային ծառայության և Քրեական ոստիկանության գլխավոր վարչությունների պետերն ի պաշտոնե կհանդիսանան ոստիկանության պետի տեղակալները, ըստ այդմ՝ առանձին տեղակալի օղակ չենք ունենա»,-ասաց Վահե Ղազարյանը: