Ձեր վստահելի աղբյուրը

«Ես այստեղ եմ` որպես ՀՀ քաղաքացի, որպես Տավուշի թեմի հոգևոր առաջնորդ, հոգևորական, որը երկար տարիների ճանաչում է և իրականում նաև ծառայություն է ունեցել գեներալ-մայոր Գրիգորի Խաչատուրովի հետ տավուշյան ամբողջ սահմանագծում, նաև մտերմություն ունեմ իր հետ»,-Հակակոռուպցիոն դատարանի դիմաց լրագրողների հետ զրույցում ասաց Տավուշի թեմի առաջնորդ Բագրատ արքեպիսկոպոս Գալստանյանը՝ անդրադառնալով Գրիգորի Խաչատուրովի նկատմամբ քրեական հետապնդման փաստին:

Նա խոսքով՝ ցավալի և անընդունելի է, երբ բանակի կարևորագույն ներկայացուցիչներից մեկը հանիրավի անազատության մեջ է, կալանավորված։ Իսկ թե ինչու է կալանավորված Խաչատուրովը, սրբազանն խորհուրդ տվեց՝ հարցն ուղղել իշխանություններին։

«Ես ոչ դատարան եմ, ոչ փաստաբան, բայց որքան կարողացել ենք հետեւել փաստաբանների ներկայացմանը, այն իրականում ոչ մի հիմք ու հենք չունեցող գործ է: Այդուհանդերձ, եթե նույնիսկ հիմք էլ ունենա, ինձ համար հարցերի հարցն է, թե ինչու է մարդը գտնվում կալանքի տակ, ինչո՞ւ են զրկել անազատությունից։ Կալանքը մեր երկրում ուղղակի պատժի միջոց է դարձել և յուրաքանչյուր մեծ ու փոքր, արդարացված ու չարդարացված քայլի համար մարդկանց կալանավորում են, այս դեպքում՝ մեր սիրելի հրամանատարը»,-ավելացրեց սրբազանը։