Ձեր վստահելի աղբյուրը

«Վստահ եմ՝ Ադրբեջանի պարագայում միշտ էլ լինելու են սադրանքներ։ Ուղղակի  հարցն այն է, թե սադրանքներն  ինչ մակարդակի վրա են լինելու»,-«Եռաբլուր» զինվորական պանթեոնում լրագրողների հետ զրույցում ասաց ԱԺ ՔՊ խմբակցության պատգամավոր Արմեն Խաչատրյանը։

Նրա խոսքով, Ադրբեջանի կողմից 1-2 կրակոցը մեր դիրքերի ուղղությամբ, ևս սադրանք է, ամեն րոպե պետք է պատրաստ լինել ցանկացած սադրանքի։

Հարցին՝ երբ իշխանություններն ասում են, որ տարածքային  պահանջներ չունեն Ադրբեջանի նկատմամբ, այդ թվում նաև Շուշիի ու Հադրութի մասի՞ն է  խոսքը, նա պատասխանեց. «Շուշիի և Հադրութի հարցով միշտ սադրում եք: Հայաստանն ընդունում է Ադրբեջանի տարածքային ամբողջականությունն այնպես, ինչպես Ադրբեջանն է ընդունում Հայաստանի տարածքային ամբողջականությունը: Թեև ընդունել է, բայց գործուն, պրակտիկ քայլերով դա չի երևում Ադրբեջանի գործողություններից։ Ցավը հենց այստեղ է։

Լեռնային Ղարաբաղի հարցը լրիվ այլ հարց է, այլ ֆորմատի մեջ է»։

Ըստ ՔՊ-ականի,  ԼՂ բնակչության անվտանգության,  ապրելու երաշխիքների խնդիրն այլ հարց է, միջազգային հարթակներում պետք է քննարկվի ու քննարկվում է, ամեն ինչ արվի, որ ԼՂ-ն լինի անվտանգ,  անվտանգային խնդիրներ չլինեն։

«Ամեն ինչ արվում է, արվելու է  Լեռնային Ղարաբաղի մեր բնակչության  անվտանգության մակարդակն ապահովված լինի։ Այսօր այդպես չէ, լուրջ խնդիրներ կան։ Ադրբեջանը փորձում է  ամեն կերպ սադրել, անգամ էթնիկ զտումների ծրագրեր է իրականացնում։ Սա տեսանելի է, ինչքան էլ փորձեն այլ շղաշով սա փակեն»,- ասաց Ա. Խաչատրյանը։