Ձեր վստահելի աղբյուրը

«Մենք հասել են այն կետին, որ արդեն զոհասեղանին դրված են Հայաստանի տարածքները»,- այսօր լրագրողների հետ հանդիպման ժամանակ ասաց «Որդիների կանչ» սոցիալ-հայրենասիրական հասարակական կազմակերպության անդամ Աննա Մկրտչյանը՝ 44-օրյա պատերազմում անմահացած Հայկազ Մկրտչյանի մայրը։

Հիշեցնենք, որ «Որդիների կանչ» ՀԿ-ն հայտարարեց, որ սկսում է ակտիվ պայքար. գլխավոր նախապայմանը ներկայիս իշխանության հեռացումն է։

Աննա Մկրտչյանի խոսքով՝ իրենց պայքարին պետք է բոլորը միանան, պետք է մարդիկ արթնանան, այդ թվում՝ զոհված տղաների ծնողները։ «Ոչ թե Հայաստանն է եղել Արցախը պահողը, այլ հակառակը։ Մենք կորցրեցինք Արցախը, հիմա կորցնում ենք Հայաստանը»,- ասաց նա՝ հույս հայտնելով, որ սա շատերը կգիտակցեն և ոտքի կկանգնեն։

Նա նշեց, որ եթե այսպես շարունակվի, չի բացառվում, որ մեկ-երկու տարի հետո չկարողանան նույնիսկ այցելել սրբատեղի դարձած Եռաբլուր։ «Այնպես, ինչպես հիմա չենք կարողանում գնալ այնտեղ, որտեղ մեր տղաներն իրենց արյունն են թափել։ Մենք պարտք ենք տղաներին»,- ընդգծեց նա։

44-օրյա պատերազմում անմահացած Մխիթար Գալեյանի հայրը՝ Գարիկ Գալեյանն էլ ասաց, որ պետք է սկսվի քաղաքական և քաղաքացիական պայքար։ Նրա խոսքով՝ իրենք այս երկրի համար  ամենաթանկն են վճարել և երկիրը կորցնելու իրավունք չունենք։

«Մենք քաղաքական գործիչներ չենք, մենք քաղաքացիներ ենք, որոնք այս երկրի համար ամենաթանկ են վճարել։ Արցախի հողը ներծծված է մեր տղաների արյունով, այդ հողը մեզ համար շատ թանկ է։ Ծնողներն Արցախից հող են բերել ու ամեն օր այդ հողից հոտ են քաշում»,- նշեց նա։ 

Գարկ Գալեյանը դիմեց այն քաղաքական ուժերին, որոնք 30 տարի գտնվել են օրենսդիր մարմնում, որոնց համար հայրենիքը թանկ է, ոտքի ելնեն։ Նա ասաց, որ պատրաստ են հանդիպել տարբեր քաղաքական ուժերի հետ, որպեսզի իրենց պայքարն առաջ գնա։

«Այդ քաղաքական ուժերը 30 տարի հայրենիք, պետություն, հող գոռալով եկել են իշխանության, պետություն են ղեկավարել, բայց այսօր մենք կորցնում ենք մեր հայրենիքը, ունենք երկու պետությունը ու այսօր կորցնում ենք։ Խնդրում եմ ընդդիմությանը ոտքի կանգնել, ժողովուրդն իրենց ձայնը նրա համար չէր տվել, որ ԱԺ-ում հարկային օրենքներ քննարկեն, այլ ոտքի կանգնեն ու երկիր փրկեն»,- նշեց Գարիկ Գալեյանը։