Ձեր վստահելի աղբյուրը

Ստեփանակերտի Սուրբ Աստվածածին առաջնորդանիստ եկեղեցում մայիսի 9-ին տեղի ունեցավ հոգեհանգստյան կարգ՝ ի հիշատակ Արցախյան առաջին, Ապրիլյան, 44-օրյա պատերազմներում և Հայրենական մեծ պատերազմում նահատակված հերոսների։

Հոգեհանգստյան կարգից հետո ՊԲ հովանավոր Սուրբ Գրիգորիսի խաչվառի առաջնորդությամբ մեկնարկեց խաչերթ դեպի Հուշահամալիր:

Երթից հետո «Ոչ Արցախի էթնիկ զտմանը» շարժման նախաձեռնողները հանրահավաք սկսեցին Ստեփանակերտի Վերածննդի հրապարակում:

Ելույթ ունեցողները շեշտում են, որ հանրահավաքն առաջին հերթին հայ ժողովրդի միասնության և կամքի ցուցադրություն է և այդ հրապարակից արցախցին ի լուր աշխարհի հայտնում է, որ ինքն է որոշելու, թե ինչպես ապրել, որտեղ և ում հետ:

Հանարհավաքի ամբիոնից կոչ հղվեց ՀՀ քաղաքացիներին՝ թույլ չտալ ՀՀ գործող իշխանություններին Արցախի անունից ստորագրել որևէ մի փաստաթուղթ, որտեղ վտանգված կլինի արցախահայության ինքնորոշման իրավունքը, իսկ ՌԴ խաղաղապահ զորկազմին հրոդորեցին անվերապահորեն կատարել իր պարտականությունները, տեր կանգնել նոյեմբերի 9-ի եռակողմ հայտարարության կետերը:

Դիմելով Արցախի իշխանություններին՝ հանրահավաքի ամբիոնից նրանց հորդորեցին ճիշտ գիտակցել իրենց պարտավորությունները ժողովրդի առաջ և չտրվել արտաքին տարբեր ազդեցություններին, տեղի չտալ Ադրբեջանի ճնշումներին և առաջնորդվել միայն Արցախի ժողովրդի կամքով:

Հանրահավաքում ելույթ ունեցավ Արցախի հանրապետության նախկին պետնախարար Ռուբեն Վարդանյանը:

«Մայիսի 9-ը մեր տոնն է ու դեռ նշելու ենք հաղթանակներ։ Սա ներկայիս Արցախի ամենակարևոր օրերից մեկն է՝ հաշվի առնելով այն, որ այս ամենը նախաձեռնել է Արցախի երիտասարդությունը»,-հայտարարեց Ռուբեն Վարդնայնը և հավելեց. «Մենք պետք է պահենք մեր արժանապատվությունը։ Միասին արդեն գծել ենք մեր կարմիր գծերը, որոնք անցնելու իրավունք ոչ ոք չունի, բայց Ադրբեջանը խախտել է նշված գծերը։ Որևէ պարագայում չպետք է թույլ տանք, որ մեր անձնագրերն ադրբեջանցին ստուգի, ոչ մեկը չպիտի սահմանափակի մեր ազատ ելումուտը Հայաստան։ 149 օր շրջափակման մեջ ենք, չունենք գազ, լույս, վիճակը շատ ծանր է, բայց պետք է շարունակենք պայքարել»:

Անդրադառնալով միջազգային հանրության գործողություններին՝ Վարդանյանն ասաց․ «Ո՞ւր է ձեր արժանապատվությունը։ Ադրբեջանը թքել է ձեզ վրա, բացեիբաց ասում է, որ չի կատարում ձեր որոշումները»։

Նա հայտարարեց, որ բոլորը գործով պետք է ցույց տան, որ կանգնած է Արցախի կողքին։

Վարդանյանը նաև արձանագրեց, որ ճգնաժամը հնարավորություն է տալիս ինքնամաքրվելու, ուղղելու սխալները, կառուցելու ազնիվ, արդար փոխհարաբերություններ իշխանությունների ու ժողովրդի միջև՝ շեշտելով, որ Ադրբեջանը ռեօկուպացիա է իրականացնում:

Նա վստահություն հայտնեց, որ Հայաստանը Արցախի կողքին է, բայց տարակուսեց, որ Լաչինի միջանցքի բացման նպատակով դեռ 120 հազար ստորագրություն է հավաքվել և դիմեց ՀՀ իշխանություններին՝ հարցնելով, թե ինչու նրանք և նրաց զավակները չեն մասնակցել ստորագրահավաքին. «Որպես պաշտոնյա, դուք սահմանափակումներ ունեք, բայց ի՞նչ է խանգարում ձեզ հայ մնալ, ի՞նչ է խանգարում ձեզ մարդ մնալ»:

Հայտարարելով, որ ընթանում է հայրենական պատերազմ, որին պետք է մասնակցի յուրաքանչյուրը և ոչ միայն բանակը՝ նախկին պետնախարարը հավելեց. «Ստեղծված իրավիճակում մեր անելիքների, քայլերի ճանապարհային քարտեզը մշակել ենք ու փոխանցել թե՛ նախագահին, թե՛ ԱԺ նախագահին։ Պատասխանատուները պետք է գլխավորեն, կազմակերպեն մեր պայքարը, իսկ եթե իրենք դա չանեն, մենք պիտի անենք»:

Հանրահավաքի մասնակիցները ուս-ուսի տվեցին և քոչարի պարեցին: