Ձեր վստահելի աղբյուրը

«Ցավոք, կրկնում եմ, ցավոք նման հնարավորությունը շատ փոքր է, որովհետև խաղաղության և միջպետական հարաբերությունների հաստատման մասին երկկողմ համաձայնագրի նախագիծը  դեռ շատ նախնական տեսք ունի և դեռ վաղ է այն ստորագրելու մասին խոսել»,-կառավարության նիստում հայտարարեց Նիկոլ Փաշինյանը, անդրադառնալով Բրյուսելում խաղաղության պայմանագրի ստրագրման հավանականության մասին շրջանառվող կարծիքին:

Նա հայտնեց, որ խաղաղության փաստաթղթի հասունացումը և ստորագրման պատրաստելը առաջնային խնդիր է:

«Ադրբեջանն իր այսօրվա գործողություններով կասկածի տակ է դնում այս ընթացքում ձեռք բերված ֆունդամենտալ պայմանավորվածությունները, որոնք արձանագրվել են 2022 թվականի հոկտեմբերի 6-ին Պրահայում և հոկտեմբերի 31-ին Սոչիում»,-ասաց Փաշինյանը և հիշեցրեց, որ դրանցում ընդգծվում է, որ Հայաստանը և Ադրբեջանը ճանաչում են միմյանց տարածքային ամբողջականությունը՝ 1991 թվականի Ալմա Աթայի հռչակագրի հիման վրա:

Ըստ Փաշինյանի դիտարկման՝ եթե Ադրբեջանը ճանաչում է Հայաստանի տարածքային ամբողջականությունը, ապա ինչո՞ւ է կրակում նրա տարածքի վրա:

«Մանավանդ, որ 2022 թվականի Սոչիի եռակողմ համաձայնագրի համաձայն կողմերը պետք է զերծ մնան ուժի և ուժի սպառնալիքի կիրառումից: Ադրբեջանն այսօր նույնպես կոպտորեն խախտել է այս գրավոր հրապարակային պայմանավորվածությունները և ընդհանրապես, դժվար է հիշել մի համատեղ ընդունված փաստաթուղթ, որն Ադրբեջանն այս ընթացքում չի խախտել»,-հայտարարեց ՀՀ գործադիր մարմնի ղեկավարը::

Նա ասաց, որ վաղ առավոտից ՀՀ ՊՆ-ն 10-15 րոպեն մեկ տեղեկություն է հրապարկում իրավիճակի վերաբերյալ և կոչ արեց ադրբեջանական ու ոչ ադրբեջանական կեղծ տեղեկատվության տարածողը չդառնալ: