Ձեր վստահելի աղբյուրը

«Հրապարակ» թերթը գրում է.

«Վարչապետի կնոջ` Աննա Հակոբյանի «Իմ քայլը» հիմնադրամին 9 մլն 662 հազար դրամ է փոխանցվել «Իզմիրլյան» հիմնադրամի կողմից։ Իզմիրլյան հիմնադրամը ստեղծվել է 1990 թվականին Դիկրան Իզմիրլյանի կողմից՝ ի հիշատակ իր ծնողների՝ Սարկիս և Մարի Իզմիրլյանների։

Հիմնադրամն իր պաշտոնական կայքում նշել է, որ հանդես է գալիս որպես «Սփյուռք-Հայրենիք համագործակցության խորհրդանիշ», մինչդեռ «Իմ քայլը» հիմնադրամի ստեղծող Աննա Հակոբյանի ամուսին Նիկոլ Փաշինյանը Չեխիայի հայ համայնքի հետ հանդիպման ժամանակ ասաց, որ «հայրենիքը նա է, որտեղ ապրում ես» և հայրենիքին չի կարելի որբանոցի նման վերաբերվել, այսինքն՝ Հայաստանը Հայաստանում չապրող հայերի՝ սփյուռքի հայրենիքը չէ․

«Մեր խնդիրն էն ա, որ մենք մի տեղ ապրել ենք, բայց մի ուրիշ տեղ հայրենիք ենք համարել, սովորաբար էնտեղ, որտեղ ապրել ենք, հայրենիք չենք համարել։ Եկեք հայրենիքը հեռվից սիրելու սովորությունը ավարտենք, հողերը դուք եք հանձնել, որ հաղթանակած հողը թողել եք, եկել երջանիկ կյանքով ապրում եք Պրագայում։ Մենք պետությանը պետք է դադարենք վերաբերվել որպես որբանոցի, 250 հազարով օգնել եք, պետության մեջ պետք է աշխատել, հարկեր գեներացնել և վճարել հարկերը»,- հայտարարեց Փաշինյանը՝ ի պատասխան Չեխիայում ապրող արցախահայի մեղադրանքների, որ նա հողեր է հանձնում։

Նշենք նաև, որ «Իզմիրլյան» հիմնադրամը «Իզմիրլյան» բժշկական կենտրոնի հիմնադիրն է` Մայր աթոռի հետ միասին, «Հայաստան» դաշինքի պատգամավոր Արմեն Չարչյանը ԲԿ-ի նախկին տնօրենն էր»։

Մանրամասները թերթի այսօրվա համարում