Ձեր վստահելի աղբյուրը

«Սոթքի բացահանքում աշխատանքների ավարտը կազմակերպության կողմից արդեն նախատեսվել էին դեռ նախորդ տարվա աշնան վերջին և բանացությունների, մեր պնդմամբ դրանք շարունակվում են և աշխատողների մեծ մասին պահում են մինչև այս տարվա ամառը, որից հետո պետք է սկսվեն կրճատումները»,-ԱԺ տնտեսական հարցերի մշտական հանձնաժողովում ասաց ՏԿԵ նախարարի տեղակալ Հովհաննես Հարությունյանը:

Նրա խոսքով՝ կառավարության կատարած աշխատանքի արդյունքում ևս 6 ամսով շարունակվել է բացահանքի աշխատանքը, որի ընթացքում աշխատողները շարունակել են աշխատավարձ ստանալ:

«Եթե մեր աշխատանքը, բանակցությունները չլիներ, ապա մենք 2022 թվականի աշնանը կունենայինք աշխատակիցների քանակի կրճատում, քանի որ  աշխատանքներն այլևս ավարտվել էին և  «Գոեպրոմայնինգ Գոլդ» ընկերությունը պետք է շարունակեր իր աշխատանքները փակ եղանակով, որովհետև արդեն կատարվել էին նախագծային փոփոխությունները »,-հայտարարեց Հարությունյանը:

Փոխնախարարը հայտնեց, որ տեղում եղել են հրաձգություններ, որոնք խաթարում էին բացահանքի մնացած փոքր ծավալի աշխատանքները, բայց տնտեսվարողը հավաստիացրել է, որ փակ եղանակով աշխատանքներին դրանք չեն խանգարում:

«Սոթքի բացահանքում փոքր ծավալով՝ երևի մեկ ամսվա աշխատանք է մնացել, այդ մեկ ամսվա աշխատանքն էլ տեղում կիրականացվի և ի վերջո բացահանքի աշխատանքները լիարժեք կդադարեցվեն, որովհետև պաշարների առումով բացահանքում եղածն այլևս սպառված կլինեն»,-ասաց  Հովհաննես Հարությունյանը: